​អាណិតណាស់! ក្មេងស្រី៨នាក់បានលង់ទឹកស្លាប់ បន្ទាប់ពីទៅលេងនៅក្បែរ​ច្រាំងទន្លេ

ចិន៖ ទីភ្នាក់ងារសារព័ត៌មានចិន ស៊ីនហួ​ បានរាយការណ៍នៅថ្ងៃចន្ទនេះថា​ សាកសពសិស្សសាលាបឋមចំនួន៨នាក់ ត្រូវបានក្រុមអ្នកជួយសង្គ្រោះរកឃើញ បន្ទាប់ពីពួកគេបានលង់ទឹកស្លាប់​ក្នុងទន្លេមួយ ដែលស្ថិតនៅទី​ក្រុងឆុងឈីង ភាគនិរតី​ប្រទេសចិន។

​ប្រភពដដែល​​បានបន្តថា ក្មេងស្រីសិស្សសាលាទាំង៨នាក់នោះ បានលង់ទឹក​ទន្លេ ហ៊្វូ ​ក្នុងភូមិតុងជៀ​ ស្រុកតុងណាន នៅវេលាម៉ោងប្រហែល ៣ៈ៣០ នាទីរសៀលថ្ងៃអាទិត្យ បន្ទាប់ពីក្មេងស្រីម្នាក់ក្នុងចំណោមនោះ បានរអិលជើងធ្លាក់ចូលទៅក្នុងទន្លេ ខណៈ​ក្មេងស្រី ៧នាក់ផ្សេងទៀត បានព្យាយាមចុះ​ទៅជួយ។

គួរឱ្យដឹងផងដែរថា ក្រោយហេតុការណ៍ដ៏អាក្រក់នេះបានកើតឡើង អាជ្ញាធរក្នុងតំបន់បានបញ្ជូនក្រុមអ្នកជួយសង្គ្រោះ ដើម្បីស្វែងរកក្មេងស្រីទាំងនោះ ​ហើយសាកសពជាច្រើន ត្រូវបានរកឃើញ​កាលពីយប់ថ្ងៃអាទិត្យ។ ​ទន្ទឹមនឹងនោះដែរ ​សាធារណៈជនជាច្រើនបាន​ធ្វើការអំពាវនាវ​ ​សុំឱ្យ​សាលារៀនទាំងអស់ ត្រូវអប់រំ​​សិស្ស​អំពីគ្រោះថ្នាក់នៃទឹក​ ក៏ដូចជា​បង្រៀន​កុមារ​ ឱ្យយល់ដឹងពី​វិធានការសង្គ្រោះបឋម នៅពេលមាននាក់លង់ទឹក៕