យ៉ូកយ៉ាកាតា៖ ជំងឺកូវីដ១៩ បានបន្តឆក់យកជីវិតពលរដ្ឋឥណ្ឌូណេស៊ីអស់ជាង ២ពាន់នាក់ ក្នុងចំណោមអ្នកឆ្លងជាង ៤ម៉ឺននាក់ នាពេលបច្ចុប្បន្ននេះ។ ដោយឡែក កាលពីថ្ងៃអាទិត្យកន្លងទៅ គ្រោះធម្មជាតិដ៏អាក្រក់មួយបានកើតឡើងជាថ្មី នោះគឺបន្ទុះភ្នំភ្លើង Mount Merapi ដែលជាភ្នំភ្លើងដ៏សកម្មបំផុតរបស់ប្រទេសឥណ្ឌូនេស៊ី។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
យោងតាមអាជ្ញាធរក្នុងតំបន់បានឱ្យដឹងថា ភ្នំភ្លើង Merapi បានផ្ទុះឡើងពីរដងក្នុងរយៈពេល ៧នាទី ដោយជះផេះលាយឡំទាំងល្បាយឧស្ម័នក្ដៅ ឡើងទៅលើអាកាសកម្ពស់ជាង ៦គីឡូម៉ែត្រ។ ទន្ទឹមនឹងនោះដែរ អាជ្ញាធរក៏បានជម្រុញប្រជាជន នៅឱ្យឆ្ងាញពីទីតាំងភ្នំភ្លើងកំពុងផ្ទុះនោះ យ៉ាងហោចណាស់ ៣ គីឡូម៉ែត្រ ដើម្បីរក្សាសុវត្ថិភាព។
គួរឱ្យដឹងផងដែរថា ឥណ្ឌូណេស៊ី គឺជាប្រទេសស្ថិតនៅតំបន់ខ្សែក្រវាត់ភ្លើង នៃមហាសមុទ្រប៉ាស៊ីហ្វិក (Pacific Ring of Fire) ដែលជាហេតុធ្វើឱ្យប្រទេសនេះតែងកើតមាន គ្រោះរញ្ជួយដី បន្ទុះភ្នំភ្លើង និងរលកយក្សស៊ូណាមិ ជាញឹកញាប់។ ហើយកាលពីឆ្នាំ ២០១០ ភ្នំភ្លើងដ៏អាក្រក់មួយបានផ្ទុះឡើង ដែលបណ្តាលមនុស្សជាង ៣៥០នាក់ ស្លាប់បាត់បង់ជីវិត និងរាប់ពាន់នាក់ផ្សេងទៀត ត្រូវជម្លៀសទៅរកទីកន្លែងសុវត្ថិភាព៕
Bong I.T