កាន់តែធ្ងន់ធ្ងរ! ករណីឆ្លងជំងឺកូវីដ-១៩ នៅទូទាំងប្រទេសប្រេស៊ីល កើនឡើងដល់ ជាង១លាននាក់

ប្រេស៊ីល៖ ឥឡូវនេះ ប្រទេសប្រេស៊ីលបានរាយការណ៍ថា មានករណីឆ្លងជំងឺកូវីដ-១៩ ជាង១លាននាក់ និងមានអ្នកស្លាប់ចំនួន៥០,០៥៨នាក់ ដែលជាព្រឹត្តិការណ៍ដ៏គួរឲ្យកត់សម្គាល់មួយ សម្រាប់ប្រទេសនៅទ្វីបអាមេរិកខាងត្បូង។

ក្រសួងសុខាភិបាលប្រទេសប្រេស៊ីល កាលពីថ្ងៃសុក្រ បានរាយករណ៍ថា មានករណីឆ្លងថ្មីចំនួន៥៤,៧៧១នាក់ ដែលបានធ្វើឲ្យចំនួនករណីឆ្លងនៅទូទាំងប្រទេសកើនឡើងដល់ជាង ១,០៣២,៩១៣នាក់ នៅថ្ងៃដដែលផងដែរ។

ជំងឺរាតត្បាតសកលកូវីដ-១៩ កំពុងតែរីករាលដាលយ៉ាងឆាប់រហ័ស ដោយគ្មានសញ្ញានៃការធ្លាក់ចុះនោះទេ ខណៈទីក្រុងធំៗបានដកចេញវិធានការគម្លាតសុវត្ថិភាពសង្គម និងចាប់ផ្ដើមបើកភោជនីយដ្ឋាន ហាង និងអាជីវកម្មដែលមិនសូវចាំបាច់ផ្សេងទៀត។

អ្នកជំនាញជាច្រើនជឿជាក់ថា ចំនួនករណីឆ្លងនេះអាចនឹងវ៉ាដាច់សហរដ្ឋអាមេរិក ហើយឆាប់ៗនេះ ប្រេស៊ីលនឹងក្លាយជាប្រទេសដែលរងការវាយប្រហារ ដោយសារវីរុសនេះខ្លាំងបំផុត។

គួរម្លឹកផងដែរថា ករណីឆ្លងថ្មីចំនួន៥៤,៧៧១នាក់ កាលពីថ្ងៃសុក្រ គឺខ្ពស់ជាងការកើនឡើងប្រចាំថ្ងៃ នៅសហរដ្ឋអាមេរិក ដែលបានរាយការណ៍ថា មានចំនួន៤៨,៥២៩នាក់ នៅថ្ងៃទី២៥ ខែមេសា៕