បែកគ្នាមែនពិត ប៉ុន្តែ Toey នៅតែធ្វើរឿងមួយនេះដាក់ Alek

ថៃ៖ រឿងរ៉ាវស្នេហារបស់គូស្នេហ៍តារាសម្ដែងប្រចាំស្ថានីយ៍ទូរទស្សន៍ថៃប៉ុស្តិ៍លេខ៣ Toey Jarinporn និង Alek Teeradetch បានដើរមកដល់ផ្លូវបំបែកមួយគូទៀតហើយ ដែលព័ត៌មានមួយនេះបានធ្វើឲ្យអ្នកគាំទ្រមានការសោកស្ដាយយ៉ាងខ្លាំង នូវចំណងស្នេហាដែលបានចំណាយពេលដើរជាមួយគ្នាអស់រយៈពេល៣ឆ្នាំមកនេះ។

ទោះបីជាបានបែកគ្នាបែបនេះទៅហើយក្ដី ក៏ភាគីទាំងសងខាងបានអះអាងថា ពួកគេនៅតែបន្តរក្សាចំណងមិត្តភាពជាមួយគ្នាតទៅមុខទៀត។ ជាក់ស្ដែង ពួកគេទាំងពីរនៅតែបន្តរក្សាទំនាក់ទំនងជាមួយគ្នានៅលើបណ្ដាញសង្គម Instagram ដដែល ខុសប្លែកពីតារាមួយចំនួន ដែលបាន Unfollow អតីតមិត្តប្រុស ឬមិត្តស្រីខ្លួនភ្លាមៗ ក្រោយពេលដែលមានលេចឮព័ត៌មាននៃការបែកបាក់គ្នានោះ។

មិនត្រឹមតែប៉ុណ្ណោះ នៅពេលដែល Alek បង្ហោះរូបភាពនៅលើ Instagram គេក៏ឃើញ Toey ចូលទៅខមមិនជាមួយនឹងស្ទីកឃើបេះដូង និងរូបញញឹមជាច្រើន បង្ហាញឲ្យឃើញថា ពួកគេនៅតែអាចរក្សាទំនាក់ទំនងមិត្តភាពបានដូចការអះអាងពិតប្រាកដមែន។ ទន្ទឹមនឹងនេះ អ្នកគាំទ្រជាច្រើនក៏បានចូលទៅឆ្លើយតបនឹងការខមមិនរបស់ Toey ដើម្បីបង្ហាញការសោកស្ដាយចំពោះការបែកបាក់ចំណងស្នេហារបស់អ្នកទាំងពីរ និងបង្ហាញក្ដីសង្ឃឹមថា ថ្ងៃណាមួយ អ្នកទាំងពីរអាចនឹងត្រឡប់មកត្រូវរ៉ូវគ្នាជាក់ជាមិនខាន៕

សូមទស្សនារូបភាពខាងក្រោម៖