ថៃ៖ ស្ថានីយ៍ទូរទស្សន៍ថៃប៉ុស្តិ៍លេខ៣ និងផលិតកម្ម Good Feeling បានរៀបចំចាប់ផ្ដើមថតខ្សែភាពយន្តភាគថ្មី ដែលមានចំណងជើងថា Khou Wen។ ប៉ុន្តែអ្វីដែលសំខាន់ ខ្សែភាពយន្តភាគថ្មីនេះ គឺមានការចូលរួមពីសំណាក់តួឯកប្រុសស្រី ដែលសុទ្ធសឹងតែជាតារាក្មេង និងធ្លាប់មានប្រវត្តិមកពីស្ថានីយទូរទស្សន៍ផ្សេង។ តារាថ្មីៗទាំងនោះរួមមាន តារាសម្ដែងស្រី Kao Suphassra និង Mo Monchanok ចំណែកឯតារាសម្ដែងប្រុសរួមមាន Peach Pachara និង God Itthipat។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សថ្វីត្បិតតែតារាទាំងបួនរូបនេះ ធ្លាប់បានសម្ដែងរឿងភាគឲ្យស្ថានីយ៍ទូរទស្សន៍ប៉ុស្តិ៍លេខ៣ បានប្រមាណពីរទៅបីរឿងរួចហើយក៏ដោយ ក៏អ្នកគាំទ្រភាគច្រើននៅតែបង្ហាញអារម្មណ៍ភ្ញាក់ផ្អើលយ៉ាងខ្លាំងចំពោះការជួបគ្នារបស់អ្នកទាំងបួននៅក្នុងរឿងភាគមួយនេះ ដោយហេតុថា រាល់ដងពួកគេសុទ្ធសឹងតែសម្ដែងរួមជាមួយនឹងតារាប្រចាំរបស់ប៉ុស្តិ៍លេខ៣ផ្ទាល់ ទើបតែរឿងមួយនេះទេ ដែលប៉ុស្តិ៍លេខ៣បានរៀបចំឲ្យតារាវ័យក្មេងចំណូលថ្មីសម្ដែងរឿងរួមគ្នានោះ។ ក្រៅពីនេះ ក៏នៅមានតារាជើងចាស់ លោក Por Natthawut មកចូលរួមសម្ដែងជាតួអង្គដ៏សំខាន់មួយផងដែរ។
បើតាមការបង្ហើបរបស់អ្នកដឹកនាំរឿង បានឲ្យដឹងថា រឿង Khou Wen គឺជាប្រភេទសាច់រឿងបែបជីវិតពិត ដែលឆ្លុះបញ្ចាំងឲ្យឃើញពីជម្លោះរបស់តួអង្គសំខាន់ៗទាំងប្រាំរូប ដែលជាតួអង្គឲ្យមនុស្សនៅក្នុងសង្គមជាក់ស្ដែង ជាពិសេសគឺតួអង្គរបស់ Kao Suphassra និង Mo Monchanok ដែលនឹងត្រូវមានឈុតឆាកកាច់កុងគ្នាជាច្រើន។ អ្វីដែលអ្នកគាំទ្រកាន់តែទន្ទឹងចង់ដឹងបន្ថែមទៀតពីរឿងភាគថ្មីមួយនេះ គឺពួកគេចង់ដឹងថា តើ Kao Suphassra នឹងត្រូវចាប់ជាដៃគូជាមួយ Peach Pachara ឬ God Itthipat ចំណែកឯ Mo Monchanok នឹងត្រូវដើរជាតួអង្គស្លូត ឬកាច។ ដូច្នេះ បើចង់ដឹងកាន់តែច្បាស់ មានតែរង់ចាំតាមដានទស្សនាទាំងអស់គ្នា ក្រោយពេលរឿងនេះត្រូវបានថតចប់រួចរាល់៕
សូមទស្សនារូបភាពខាងក្រោម៖