មិនធម្មតា! ៣ថ្ងៃជាប់ៗគ្នាមកនេះ ប្រទេសប្រេស៊ីលមានអ្នកស្លាប់ដោយសារកូវីដ-១៩ ជាង ១០០០នាក់ក្នុងមួយថ្ងៃ

ប្រេស៊ីល៖ បច្ចុប្បន្ននេះ ប្រេស៊ីលគឺជាប្រទេសដែលគ្រោះខ្លាំងបំផុត ដោយសារជំងឺកូវីដ-១៩ បើធៀបនឹងប្រទេសដទៃទៀតក្នុងតំបន់អាមេរិកឡាទីន។ ជាក់ស្ដែង រយៈពេល៣ថ្ងៃជាប់ៗគ្នាមកនេះ ប្រទេសប្រេស៊ីលបានកត់ត្រាពីករណីស្លាប់ជាង១,០០០នាក់ក្នុងមួយថ្ងៃ។

យោងតាមអាជ្ញាធរសុខាភិបាលប្រេស៊ីល នៅថ្ងៃព្រហស្បតិ៍ ទី១៨ ខែមិថុនា ម្សិលមិញនេះ បានរាយការណ៍ថា អ្នកស្លាប់ចំនួន ១,២៣៨នាក់ និងអ្នកឆ្លងថ្មីចំនួន ២២,៧៦៥នាក់ បានកត់ត្រាក្នុងរយៈពេលត្រឹមតែ ២៤ម៉ោងប៉ុណ្ណោះ។ ហើយតួលេខនេះ នាំឲ្យចំនួនស្លាប់សរុបកើនដល់ ៤៧,៧៤៨នាក់ និងករណីឆ្លងសរុបកើនដល់ ៩៧៨,១៤២នាក់ ជាមួយនឹងអត្រាមរណភាពប្រមាណ ៤.៩%។

គួរជម្រាបដែរថា ទីក្រុងសៅប៉ូឡូជាចំណុចផ្ទុះខ្លាំងបំផុតក្នុងប្រទេសប្រេស៊ីល ជាមួយនឹងករណីឆ្លងសរុប ១៩២,៦២៨នាក់ និងស្លាប់ ១១,៨៤៦នាក់ ហើយបន្ទាប់ទៀត គឺជាទីក្រុងរីយ៉ូ ដេ ហ្សាណេរ៉ូ មានករណីឆ្លងសរុប ៨៧,៣១៧នាក់ និងស្លាប់ ៨,៤១២នាក់ផងដែរ៕

ប្រភព៖ ទីភ្នាក់ងារព័តមាន ស៊ីនហួ

សូមទស្សនារូបភាពខាងក្រោម៖