ប្រេស៊ីលរកឃើញករណីឆ្លងជំងឺកូវីដ-១៩ ជាង៣ម៉ឺននាក់ ស្ទើរតែរាល់ថ្ងៃ ហើយករណីឆ្លងសរុប នឹងហក់ដល់១លាននាក់ ក្នុងពេលឆាប់ៗ

ប្រេស៊ីល៖ ក្រសួងសុខាភិបាលប្រេស៊ីល នៅថ្ងៃពុធនេះ បានរាយការណ៍ថា មានករណីឆ្លងថ្មីនៃជំងឺកូវីដ-១៩ ចំនួន៣២,១៨៨នាក់ ដែលនាំឲ្យករណីឆ្លងនៅទូទាំងប្រទេសកើនឡើងដល់ចំនួន៩៥៥,៣៧៧នាក់។ ក្រសួងក៏បានបញ្ជាក់ផងដែរ ពីករណីស្លាប់ថ្មីនៃវីរុសនេះចំនួន១,២៦៩នាក់ ដែលធ្វើឲ្យករណីស្លាប់សរុបកើនឡើងដល់ចំនួន៤៦,៥១០នាក់។

បន្ថែមពីនេះ ប្រទេសប្រេស៊ីលកំពុងឈរនៅលេខរៀងទី២ ទាំងករណីឆ្លងនិងស្លាប់ច្រើនជាងគេបំផុតនៅលើពិភពលោក បន្ទាប់ពីសហរដ្ឋអាមេរិក។

អាជ្ញាធរសុខាភិបាលប្រទេសប្រេស៊ីលបាននិយាយ កាលពីថ្ងៃចន្ទថា ពួកគេនឹងណែនាំឲ្យប្រើថ្នាំប្រឆាំងនឹងជំងឺគ្រុនចាញ់ hydroxychloroquine សម្រាប់ការព្យាបាលក្មេងៗនិងស្ត្រីមានផ្ទៃពោះ ហើយក៏បានរិះគន់ការសម្រេចចិត្តរបស់រដ្ឋបាលចំណីអាហារនិងឪសថអាមេរិក (FDA) ក្នុងការបញ្ឈប់ការប្រើថ្នាំនេះជាបន្ទាន់៕