កូរ៉េខាងត្បូង៖ អ្នកជំនាញផ្នែកសត្វបុរាណបាននិយាយថា ស្នាមជើងពីបុរាណដែលបានបង្កប់ នៅក្នុងថ្ម នៅប្រទេសកូរ៉េខាងត្បូង ទំនងជាក្រពើបុរេប្រវត្តិ ដែលបានដើរដោយប្រើជើងពីរ។ វាជាលើកដំបូងហើយ ដែលដំណើរបែបនេះ ត្រូវបានគេប្រទះឃើញនៅខ្សែស្រឡាយរបស់ក្រពើបុរាណ ដែលជាធម្មតា ក្រពើសម័យបច្ចុប្បន្នដើរដោយប្រើជើងបួន រួមទាំងសត្វក្រពាផងដែរ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សស្នាមទាំងនេះត្រូវបានរក្សាទុកយ៉ាងល្អ រួមមានស្នាមជើងដែលមានប្រវែង ១៨សង់ទីម៉ែត្រទៅ២៤សង់ទីម៉ែត្រ ដែលអាចបង្ហាញថា វាមានដងខ្លួនរហូតដល់៣ម៉ែត្រ។ ក្រុមអ្នកស្រាវជ្រាវមកពីប្រទេសកូរ៉េខាងត្បូងនិងសហរដ្ឋអាមេរិកបាននិយាយថា ស្នាមជើងទាំងនេះទំនងជារបស់ក្រពើបុរាណ ដែលត្រូវបានគេដាក់ឈ្មោះឲ្យថា Batrachopus grandis។
ក្រពើ Batrachopus grandis អាចនឹងរស់នៅជាង១០០លានឆ្នាំមុន ហើយពួកវាភាគច្រើនបានរស់នៅលើគោក ជាជាងនៅក្នុងទឹក ខុសពីកូនចៅជំនាន់ក្រោយរបស់វា។ វាអាចទៅរួច ដែលសត្វប្រភេទនេះអាចដើរជើងពីរ ប៉ុន្តែក៏អាចដើរជើងបួនបានផងដែរ។
មិនមានសត្វក្រពើបុរេប្រវត្តិដែលដើរជើងពីរ ត្រូវបានគេរកឃើញនៅសម័យនេះទៀតឡើយ បើទោះបីជាការសិក្សាបានបញ្ជាក់ថា ក្រពើដែលដើរជើងពីរចាប់ផ្ដើមមានវត្តមាននៅលើផែនដី តាំងពី២៥០លានឆ្នាំមុន។
មុននឹងឈានដល់ការសន្និដ្ឋាន ក្រុមអ្នកជំនាញខាងផ្នែកសត្វបុរាណបានពិភាក្សារួចហើយ ថាតើជើងពីរនៅខាងមុខរបស់វា មិនបានជាន់ដីខ្លាំង ដូចជើងពីរនៅខាងក្រោយ ឬសត្វនេះកំពុងហែលទឹក នៅពេលវាបង្កើតស្នាមទាំងនេះឡើង៕