កើនឡើងទៀតហើយ! ប្រទេសថៃរកឃើញករណី COVID-១៩ ថ្មីចំនួន ៧ ករណី ប៉ុន្តែគ្មានអ្នកស្លាប់ឡើយ

ថៃ៖ រដ្ឋាភិបាលថៃបានរាយការណ៍ពីករណីឆ្លងជំងឺ COVID-១៩ ថ្មីចំនួន ៧ ករណី និងគ្មានអ្នកស្លាប់ថ្មីទេ នៅថ្ងៃចន្ទ ទី០៨ ខែមិថុនា ហើយចំនួនអ្នកឆ្លងជំងឺនេះសរុបនៅក្នុងប្រទេសថៃកើនដល់ ៣,១១៩ នាក់ ដោយមានអ្នកស្លាប់ចំនួន ៥៨ នាក់ចាប់តាំងពីខែមករា។

ករណីថ្មីទាំងអស់ត្រូវបានរកឃើញនៅបន្ទាប់ពីការដាក់ដាច់ដោយឡែកនៅប្រទេសនេះរយៈពេលពីរសប្តាហ៍ដោយពុំមានការចម្លងនៅតាមមូលដ្ឋានទេ។

លោក Taweesilp Visanuyothin អ្នកនាំពាក្យរបស់មជ្ឈមណ្ឌលរដ្ឋបាលសម្រាប់ស្ថានភាពជំងឺ COVID-១៩ របស់រដ្ឋាភិបាលបានមានប្រសាសន៍ថា ប្រទេសថៃបានរាយការណ៍ថាមានករណីឆ្លងជំងឺ COVID-១៩ ចំនួន ៧៧ ករណីក្នុងរយៈពេល ១៤ ថ្ងៃកន្លងមក ដែលអ្នកទាំងអស់នោះសុទ្ធតែទើបត្រឡប់មកពីបរទេស។

ក្នុងនោះក៏មានអ្នកជំងឺម្នាក់ទៀតផងដែរ ដែលបានជាសះស្បើយក្នុងរយៈពេល ២៤ ម៉ោងចុងក្រោយនេះ ដែលនាំឱ្យចំនួនអ្នកជំងឺដែលជាសះស្បើយសរុបកើនដល់ចំនួន ២,៩៧៣ នាក់៕

ប្រភព៖ Bangkok Post