តាមរបាយការណ៍របស់មន្ត្រីនគរបាលខេត្តតាកែវបានឲ្យដឹងថា ជនសង្ស័យម្នាក់ឈ្មោះ
ឈុន សុមេធា ភេទប្រុស មានតួនាទីជាកងរាជអាវុធហត្ថខេត្តតាកែវ (ដែលមានឋានន្តរស័ក្តិ
វរសេនីយ៍ត្រី ឋានៈជានាយការិយាល័យបទល្មើសគ្រឿងញៀន) រស់នៅស្រុកអង្គរបូរី
ខេត្តតាកែវ ត្រូវបានសមត្ថកិច្ចឃាត់ខ្លួនពាក់ព័ន្ធករណីគ្រឿងញៀន។ នេះបើតាមការផ្សាយជាផ្លូវការពីអគ្គស្នងការដ្ឋាននគរបាលជាតិ។
ក្រៅពីឃាត់ខ្លួនមន្ត្រីជាន់ខ្ពស់ខាងលើ អាជ្ញាធរក៏បានឃាត់ខ្លួនជនសង្ស័យជាស្ត្រីម្នាក់ទៀតឈ្មោះ កេន ចាន់រី មុខរបរមិនប្រាកដ ដែលមានទីលំនៅក្នុងស្រុកត្រាំកក់ ខេត្តតាកែវផងដែរ។
ដំណើរដើមទងដំបូងឡើយ អាជ្ញាធរពាក់ព័ន្ធបញ្ជាក់ថា សមត្ថកិច្ចបានចុះទៅឆែកឆេរក្នុងលំនៅដ្ឋានពីរទីតាំង រួចបានចាប់ឃាត់ខ្លួនជនសង្ស័យចំនួន ០២នាក់ រួមនិងគ្រឿងញៀនជិត ២គីឡូក្រាម និងកញ្ឆាក្រៀម ចំនួន០២បេ ស្ថិតនៅត្រង់ចំណុចមូលដ្ឋានស្រុកអង្គរបូរី និងស្រុកត្រាំកក់ ក្នុងខេត្តតាកែវ កាលពី ថ្ងៃព្រហស្បតិ៍ ថ្ងៃទី០៤ ខែមិថុនា ឆ្នាំ២០២០។
ជាការកត់សម្គាល់អាជ្ញាធរបញ្ជាក់ថា វត្ថុតាងរួមមានអាវុធខ្លីចំនួន០២ដើម (ប្រើហ្គាស់) និងជញ្ជីងថ្លឹងថ្នាំញៀនចំនួន០១គ្រឿង គ្រឿងញៀនជិត ០២គីឡូ និងរុក្ខជាតិញៀន(កញ្ឆា)ក្រៀមចំនួន០២បេ ម៉ាស៊ីនកាមេរ៉ាសុវត្ថិភាពចំនួន០១គ្រឿង ស្លាកលេខម៉ូតូចំនួន ០៣ផ្លាក និងកាតគ្រីម៉ូតូចំនួន ០២សន្លឹក។
គួរបញ្ជាក់ថា បច្ចុប្បន្នជនសង្ស័យទាំងពីរនាក់ រួមជាមួយវត្ថុតាងត្រូវបានកម្លាំងនគរបាលមន្ទីរប្រឆាំងគ្រឿងញៀន ក្រសួងមហាផ្ទៃ នាំខ្លួនយកទៅមន្ទីរប្រឆាំងគ្រឿងញៀន ដើម្បីកសាងសំណុំរឿងចាត់ការតាមនីតិវិធី៕