អាមេរិក៖ បុរសស្បែកខ្មៅ George Floyd បានស្លាប់បាត់បង់ជីវិតកាលពីសប្ដាហ៍មុន បន្ទាប់ពីប៉ូលិសផ្ទប់មុខលោកទៅនឹងដី ដោយប្រើជង្គង់សង្កត់ពីលើ.ក ទោះបីពេលនោះលោកនិយាយថា លោកមិនអាចដកដង្ហើមបានក៏ដោយ។ ករណីនោះ បានធ្វើឲ្យពលរដ្ឋអាមេរិកមួយចំនួនធំផ្ទុះកំហឹងនឹងឈានដល់ការធ្វើបាតុកម្ម រួមទាំងបំផ្លិចបំផ្លាញទ្រព្យសម្បត្ដិសាធារណៈ និងឯកជនថែមទៀតផង។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សតែយ៉ាងណាមិញ លោក Terrance Floyd ដែលត្រូវជាប្អូនប្រុសរបស់ជនរងគ្រោះ មិនគាំទ្រការធ្វើបាតុកម្មទាមទារយុត្ដិធម៌របស់ពលរដ្ឋអាមេរិកឡើយ ដោយសារតែ ជនឆ្លៀតឱកាសមួយចំនួន បាននាំគ្នាដុតបំផ្លាញ និងលួចរបស់របរមានតម្លៃពីហាងនានាយ៉ាងអនាធិបតេយ្យ។
តួយ៉ាង នៅឯពិធីគោរពវិញ្ញាញក្ខន្ធបណ្ដោះអាស្ននរបស់លោក George Floyd ស្ថិតក្នុងទីក្រុង Minneapolis រដ្ឋ Minnesota លោក Terrance Floyd បានអំពាវនាវឲ្យក្រុមបាតុករមេត្ដាបញ្ឈប់សកម្មភាពទាំងនោះ ព្រោះថា រាល់អំពើហិង្សា និងការបំផ្លិចបំផ្លាញមិនបានជួយអ្វីដល់គ្រួសារលោកនោះទេ។ ជាពិសេស វាក៏មិនអាចនាំបងប្រុសរបស់លោកឲ្យត្រឡប់មកវិញដែរ។
លោក Terrance Floyd បានបន្ថែមទៀតថា ការធ្វើបាតុកម្មទាំងកំហឹង និងហិង្សាបែបនេះ ប្រៀបដូចជាការផឹកស្រវឹងអីចឹង។ ពេលស្រវឹងមានអារម្មណ៍សប្បាយ តែលុះពេលស្វាង អ្នកទាំងអស់គ្នានឹងឆ្ងល់ពីអ្វីដែលខ្លួនបានធ្វើ។
គួរជម្រាបថា ការធ្វើបាតុកម្មទាមទារយុត្ដិធម៌ជូនលោក George Floyd មិនមែនមាននៅតែសហរដ្ឋអាមេរិកប៉ុណ្ណោះទេ។ ជាក់ស្ដែង កាលពីថ្ងៃទី៣១ ខែឧសភា កន្លងទៅនេះ ពលរដ្ឋនៅក្នុងទីក្រុងឡុងដ៍ប្រទេសអង់គ្លេស និងទីក្រុងប៊ែរឡាំងប្រទេសអាល្លឺម៉ង់រាប់រយនាក់ ក៏បានប្រមូលផ្ដុំគ្នាតវ៉ានៅក្បែរបរិវេណស្ថានទូតអាមេរិកផងដែរ ប៉ុន្ដែពុំមានអំពើហិង្សាណាមួយកើតឡើងឡើយ៕
សូមទស្សនារូបភាពខាងក្រោម៖