ទុក្ខជាន់ទុក្ខ! ឆេះអគារមន្ទីរពេទ្យដាក់អ្នកជំងឺកូវីដ-១៩ នៅបង់ក្លាដែស បណ្តាលឲ្យមនុស្ស៥នាក់ស្លាប់ (មានវីដេអូ)

ដាកា៖ យ៉ាងហោចណាស់ មនុស្សចំនួន៥នាក់បានស្លាប់បាត់បង់ជីវិត នៅក្នុងគ្រោះអគ្គិភ័យឆាបឆេះអគារមន្ទីរពេទ្យ សម្រាប់ដាក់អ្នកជំងឺកូរីដ-១៩ ដ៏ឈានមុខមួយរបស់ប្រទេសបង់ក្លាដែស កាលពីថ្ងៃពុធ ទី២៧ ខែឧសភា​ ម្សិលមិញនេះ។ នេះបើតាមការដកស្រង់ពីសារព័ត៌មាន CNA ។

ហេតុការណ៍អគ្គិភ័យ បានកើតឡើងនាវេលាម៉ោង៩ និង៤៨នាទីយប់ (ម៉ោងក្នុងប្រទេសបង់ក្លាដែស) នៅសង្កាត់ហ្គូហាន់សាន នៃរដ្ឋធានីដាកា។ បើតាមទីភ្នាក់ងារពន្លត់អគ្គិភ័យ លោក Kamrul Hasan បានប្រាប់សារព័ត៌មានមួយថា អគ្គិភ័យបានឆាបឆេះឡើងនៅពេលម៉ាសុីនត្រជាក់ផ្ទុះ ប៉ុន្ដែក្រុមការងាររបស់លោក អាចគ្រប់គ្រងស្ថានភាពបានវិញ ក្នុងរយៈពេលប្រហែល១ម៉ោង។ តែជាអកុសល មានមនុស្សចំនួន៥នាក់ ដែល៣នាក់ជាអ្នកជំងឺកូវីដ-១៩ និង២នាក់ទៀតតេស្តអវិជ្ជមាន បានស្លាប់បាត់បង់ជីវិត។

គួរឲ្យដឹងផងដែរថា ហេតុការណ៍ខាងលើបានកើតឡើងស្របពេលប្រទេសបង់ក្លាដែស កំពុងរងគ្រោះដោយសារជំងឺកូវីដ-១៩ ខ្លាំងនៅប៉ុន្មានសប្ដាហ៍ចុងក្រោយនេះ។ ហើយបច្ចុប្បន្ន ប្រទេសនេះមានករណីឆ្លងសរុបជិត ៤០,០០០នាក់ និងអ្នកស្លាប់កើនដល់ ៥៤៥នាក់ផងដែរ៕

សូមទស្សនារូបភាព និងវីដេអូខាងក្រោម៖