ចង់ទាក់​ចិត្ត​​អ្នក​ទេស​ចរ! ថៃ​គ្រោង​បញ្ចុះ​តម្លៃ​ ៥០%​សម្រាប់​​​ទីតាំង​កម្សាន្ត​សំខាន់ៗ នៅខែកក្កដាខាងមុខ

បច្ចុប្បន្ននេះ ទីកន្លែងដើរកម្សាន្តនៅលើពិភពលោកមួយចំនួនធំត្រូវបានបិទ ហើយមនុស្សគ្រប់គ្នា​ក៏មិនអាចទៅណាមកណាដូចពីមុនឡើយ ដោយសារការរាតត្បាតនៃវីរុសកូវីដ-១៩។ យ៉ាងណាមិញ មួយរយៈចុងក្រោយនេះ គឺមានពត៌មានពីប្រទេសមួយចំនួនផងដែរ​ បាន​ប្រកាសលែងរឹតបន្តឹងផ្នែក​ទេសចរណ៍​ ហើយដោយបានបើកច្រកព្រំដែនជាថ្មីម្តងទៀត។

អ្វីដែលរឹតតែពិសេសនោះគឺប្រទេសថៃគ្រោងនឹងបញ្ចុះតម្លៃដល់ទៅ ៥០ ភាគរយចំពោះទីកន្លែងស្នាក់​នៅ​ដល់ភ្ញៀវទេសចរណ៍នាឆាប់ៗខាងមុខនេះ។

ជើងហោះហើរច្រកអន្តរជាតិរបស់ប្រទេសថៃត្រូវបានបិទរហូតដល់ថ្ងៃទី ៣០ ខែ មិថុនា ឆ្នាំ ២០២០ ប៉ុន្តែប្រទេសមួយនេះក៏កំពុងពិចារណាបើកច្រកចេញចូលជាមួយប្រទេសជិតខាងដូចជាប្រទេសកូរ៉េ​ខាងត្បូងនាពេលខាងមុខនេះដែរ។ ចំពោះជើងហោះហើរក្នុងស្រុក គឺបានបើកដំណើរការហើយតាំង​ពីថ្ងៃទី ១៥ ខែ ឧសភា ឆ្នាំ​ ២០២០។

ដើម្បីពង្រីកសក្តានុពលវិស័យទេសចរណ៍របស់ខ្លួនជាងថ្មីម្តងទៀត ប្រទេសថៃគ្រោងនឹងផ្តល់គូប៉ុង​បញ្ចុះតម្លៃ និងកញ្ចប់ដំណើរកម្សាន្តសម្រាប់ភ្ញៀវទេសចរណ៍បន្ទាប់ពីបិទប្រទេសមួយរយៈពេលវែង។ ការិយាល័យក្រុមប្រឹក្សាជាតិអភិវឌ្ឍន៍សេដ្ឋកិច្ចនិងសង្គម គ្រោងនឹងបើកការបញ្ចុះតម្លៃរហូតដល់ ៥០ ភាគរយលើការស្នាក់នៅក្នុងខែកក្កដា ឆ្នាំ២០២០ នេះ។

រីសត និងសណ្ឋាគាររំពឹងថានឹងបញ្ចុះតម្លៃដល់ភ្ញៀវទេសចរណ៍ពី ៤០ ទៅ ៥០ ភាគរយនាខែកក្កដា នេះឬក៏ចុងឆ្នាំនេះផងដែរ៕

ប្រភព៖ GirlStyle