សាលារៀនគ្រប់កម្រិតនៅមីយ៉ាន់ម៉ានឹងបើកដំណើរការវិញនៅខែកក្កដាខាងមុខ

មីយ៉ាន់ម៉ា៖ សាលារៀននៅមីយ៉ាន់ម៉ានឹងបើកដំណើរការវិញនៅខែកក្កដាដោយចាប់ផ្តើមពីវិទ្យាល័យនៅថ្ងៃទី ២១ ខែកក្កដាបន្ទាប់មកសាលាមធ្យម និងបឋមសិក្សានៅ ២ សប្តាហ៍ក្រោយ នេះបើយោងតាមនាយកដ្ឋានអប់រំមូលដ្ឋាន។

រដ្ឋមន្រ្តីក្រសួងអប់រំលោក U Myo Thein Gyi បានមានប្រសាសន៍នៅក្នុងកិច្ចប្រជុំមួយថាសាលារដ្ឋនឹងត្រូវបើកនៅ ថ្ងៃទី ២១ ខែកក្កដាហើយសាលានេះក៏រួមបញ្ចូលទាំងសាលាឯកជន និងសាលាខាងបព្វជិតផងដែរ។

លោកបណ្ឌិត Bio ប្រធានសមាគមគ្រូបង្រៀនសាលាឯកជនបានមានប្រសាសន៍ថាទោះបីយ៉ាងណាសាលានានា ចាំបាច់ត្រូវធ្វើតាមការណែនាំរបស់ EU និងក្រសួងសុខាភិបាលនិងកីឡា។ លោកបណ្ឌិតបានបន្ថែមថា “ លោករដ្ឋមន្រ្តីបានប្រាប់យើងថាវាអាចនឹងមានហានិភ័យខ្ពស់នៅតាមសាលារៀនជាប់ព្រំដែន។ វានឹងមានការលំបាកខ្លាំងណាស់ហើយលទ្ធិភាពនៃការឆ្លងគឺខ្ពស់ណាស់។ គ្រូក៏មានការលំបាកផងដែរ ហើយអាចសន្មត់បានថាពួកគេ មិនចង់អោយសាលារៀនបើកវិញទេ។"

កាលពីមុនក្រសួងអប់រំបានគ្រោងនឹងបើកសាលាបឋមសិក្សាម្តងរួចមកហើយ ប៉ុន្តែបានសម្រេចចិត្តមិនធ្វើបែបនេះវិញ បន្ទាប់ពីសាធារណជនបានបង្ហាញការព្រួយបារម្ភ។

ក្នុងសន្និសីទវីដេអូនៅថ្ងៃទី ១២ ខែឧសភា លោកស្រីអ៊ុងសានស៊ូជី (Daw Aung San Suu Kyi) បាននិយាយថា សាលារៀនត្រូវតែបើកដំណើរការឡើងវិញឱ្យបានឆាប់តាមតែអាចធ្វើទៅបាន ប៉ុន្តែជាមួយនឹងការផ្លាស់ប្តូរចាំបាច់ដើម្បីអនុលោមតាមបទប្បញ្ញត្តិនៃជំងឺ COVID-១៩។ “សាលារៀនត្រូវបើកដំណើរការឡើងវិញ។ វាមិនងាយស្រួលទេប្រសិនបើយើងរង់ចាំបើកសាលារៀនឡើងវិញបន្ទាប់ពីជំងឺនេះត្រូវបានគ្រប់គ្រងនោះ”។

នៅក្នុងសន្និសីទវីដេអូមួយផ្សេងទៀតនៅថ្ងៃទី ១៩ ឧសភាទីប្រឹក្សារដ្ឋរូបនេះបាននិយាយថា ខណៈពេលដែលប្រទេសអភិវឌ្ឍន៍មួយចំនួនបានចាប់ផ្តើមអនុវត្តកម្មវិធីរៀនតាមអ៊ិនធឺរណែតចំពេលជំងឺរាតត្បាត COVID-១៩ ប្រទេសមីយ៉ាន់ម៉ាមិនទាន់ត្រៀមខ្លួនដើម្បីទទួលយកវិធានការទាំងនេះទេ។

គោលការណ៍ណែនាំសម្រាប់សាលារៀនគឺការរក្សាគម្លាតសង្គមយ៉ាងតិច ៦ ហ្វីតរវាងគ្នានិងគ្នា។ សាលាឯកជនបានបង្ហាញពីការលំបាករបស់ពួកគេទាក់ទងនឹងទីកន្លែងសិក្សា។ លោកបណ្ឌិត Bio បានបន្ថែមថា ស្ថាបនិកសាលាឯកជនបានស្នើទៅក្រសួងអប់រំឱ្យអនុញ្ញាតឱ្យពួកគេបង្រៀននៅក្នុងថ្នាក់រៀនដែលទូលាយជាងមុន ជំនួសឱ្យនៅខាងក្នុងថ្នាក់រៀនដោយមានកញ្ចក់បាំង។

លោកបណ្ឌិត Bio មានប្រសាសន៍ថា“ រដ្ឋមន្រ្តីបានជូនដំណឹងដល់យើងថាសាលាឯកជនត្រូវការចែក តុសិក្សា ដែលមានកញ្ចក់ថ្លានិងរៀបចំបន្ទប់ពិសេសដើម្បីពិនិត្យសុខភាពដូចជាគ្រុនក្តៅ”។ ចំណែកថ្នាក់រៀនរបស់សាលារដ្ឋត្រូវវាស់គម្លាត ៣០ ហ្វ៊ីត ហើយវាអាចផ្ទុកសិស្សបានប្រហែល ២០ នាក់ប្រសិន បើពួកគេតម្រូវឱ្យមានគម្លាតសង្គម ៦ ហ្វ៊ីត។

ស្ថាបនិកសាលាឯកជនបាននិយាយថា សាលាឯកជននៅទីក្រុង Yangon ត្រូវមានទំហំបន្ទប់ ៤០ គុណនឹង ៦០ ហ្វីតដូច្នេះពួកគេអាចបង្រៀន ៣ ថ្ងៃក្នុងមួយសប្តាហ៍ដោយបែងចែកថ្នាក់សិក្សា។

លោក U Win Naing អ្នកសម្របសម្រួលសម្រាប់ការអភិវឌ្ឍសាលាខាងបព្វជិតបាននិយាយថាសាលាឯកជន មួយចំនួនដែលបានទទួលកម្មវិធីសិក្សានិងសៀវភៅសិក្សាបានចាប់ផ្តើមថ្នាក់ អ៊ិនធឺរណែតរបស់ពួកគេរួចហើយនៅដើមខែឧសភា ប៉ុន្តែសាលាខាងបព្វជិតមានការលំបាកក្នុងការអនុវត្ត៕

ប្រភព៖ The Myanmar Times