កម្សាន្ត៖ ជាតិជាមនុស្សស្រី គ្មានប្រាថ្នាចង់បានអ្វីច្រើននោះទេ គឺសុំត្រឹមតែមានបុរសម្នាក់ ដែលចេះយល់ចិត្ត ផ្តល់ក្តីស្រលាញ់ស្មោះត្រង់ នៅក្បែរដឹងទុក្ខធុរៈ ទោះប្បីកំពុងស្ថិតក្នុងស្ថានភាព លំបាកយ៉ាងណា ក៏នៅតែព្យាយាមជំនះជាមួយគ្នា មិនលែងដៃគ្នា ហើយក៏មិនទៅលួចលាក់ មានអ្នកទី៣ទៅបានហើយ។ ចុះចំណែកមនុស្សប្រុសវិញ គិតបែបណាដែរ?
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សទទួលស្គាល់ថា គ្មាននរណាម្នាក់ ដែលថាល្អឥតខ្ចោះនោះទេ ចំណែកមនុស្សប្រុសក៏ដូចគ្នា គឺរមែងតែងមាន នៅការខូចខិលផឹកស៊ី ស្រីញីផ្សេងៗមិនអត់នោះទេ។ ក៏ប៉ុន្តែទន្ទឹមនឹងនេះ ក៏ឃើញថាមានមនុស្សប្រុសខ្លះ នៅពេលដែលបានជួប ជាមួយមនុស្សស្រី ដែលគេស្រលាញ់ពិតប្រាកដ ក៏ប្តេជ្ញាកែប្រែខ្លួនមកជាល្អវិញ ។ តែក៏មានមនុស្សប្រុសអ្នកខ្លះទៀត បង្ហាញភាពល្អបានតែពីដំបូង តែនៅពេលដែលរៀបការហើយ ក៏ស្រាប់តែបែ្រមកជាខូចខិល ផ្ទុយខុសដាច់កាលពីមុនទៅវិញ។
តើមនុស្សប្រុសខិលខូច មុនរៀបការរួចកែខ្លួន និង ល្អពេលនៅកម្លោះ តែខូចខិលក្រោយរៀបការ មួយណាល្អជាង?
១. មនុស្សប្រុសខិលខូច មុនរៀបការរួចកែខ្លួន
តាមតថភាពជាក់ស្តែង មនុស្សប្រុសដែលខូចខិល មុនពេលរៀបការគឺ ត្រូវបានគេចាត់ទុកថា ជារឿងធម្មតាទៅហើយ។ ក៏ព្រោះតែយុវវ័យ ជាវ័យមួយដែលភ្លើតភ្លើន ចង់សប្បាយ ដើរលេងឡូយឆាយផឹកស៊ី បង្អួតសម្ភារៈនិយម ប្តូរដៃគូរស្នេហាច្រើនជាដើម។ តែនេះវានៅមិនទាន់ជា បញ្ហាចោទណាមួយ នៅឡើយនោះទេ ក៏ព្រោះតែអ្នក នៅខ្លួនមួយនៅឡើយ។ ពោលគឺមិនទាន់មានគ្រួសារ ក៏ដូចជាមិនទាន់ភ្ជាប់ ចំណងខាន់ស្លា ជាមួយនារីណាម្នាក់ នៅឡើយនោះទេ។
២. ល្អពេលនៅកម្លោះ តែខូចខិលក្រោយរៀបការ
ផ្ទុយទៅវិញ ប្រសិនបើមនុស្សស្រីណា ដែលជួបនឹងមនុស្សប្រុស ដែលស្ថិតក្នុងប្រភេទទីពីរនេះ គឺច្បាស់ជាទឹកភ្នែក ហូរជូតក្បាលជង្គង់ ជាមិនខាននោះទេ។ ពោលគឺមុនដំបូង ត្រឹមត្រូវខ្លាំងណាស់ តែដល់ពេលដែលរៀបការ មានគ្រួសារហើយ ចាប់ដៃគ្នារកស៊ីមានបានបន្តិច ក៏ចាប់ផ្តើមបែកចិត្តខូចខិល ដើរលេងស៊ីផឹក ស្រីញីអូនបង ទុកមិត្តភក្តិនិង ស្រីក្រៅផ្ទះសំខាន់ជាងប្រពន្ធកូន ដែលរួមរស់ជាមួយគ្នា ដឹងទឹកក្តៅទឹកត្រជាក់ រាល់ថ្ងៃទៅវិញ។ ទ្រាំអត់ទ្រាំឃ្លាន ជាមួយគ្នាបាន តែគ្មានមនុស្សស្រីណា អាចស៊ូទ្រាំចែករំលែក ប្តីដែលខ្លួនស្រលាញ់ ជាមួយនឹងស្រីដទៃទៀតនោះទេ។ ជាការពិតមនុស្សស្រី ពូកែអត់ធ្មត់ខ្លាំងណាស់ ព្រោះតែមិនចង់មានការបែកបាក់ ហើយក៏មិនចង់មានឈ្មោះ ថាជាស្ត្រីមេម៉ាយនោះទេ តែការអត់ទ្រាំរបស់មនុស្ស ក៏មានព្រំដែនកំណត់ របស់វាផងដែរ។ ដូច្នេះប្រសិនបើ បុរសជាប្តីនៅតែមិនព្រមកែខ្លួន ទេនោះ ច្បាស់ណាស់មិនយូរមិនឆាប់ ជីវិតប្តីប្រពន្ធក៏នឹងអាចដើរដល់ ផ្លូវបំបែកដូចគ្នាដែរ។
ដូចពាក្យចាស់មួយ តែងពោលថា ស៊ូលំបាកមុន ដើម្បីឲ្យបានស្រនុកក្រោយ ប្រសើរជាងស្រនុកមុនដំបូង លំបាកក្រោយដែរ។ ដូច្នេះដូចគ្នាដែរ មនុស្សស្រីដែលបានស្វាមី ដែលល្អមិនចេះខូចខិល មុនពេលរៀបការ កុំទាន់សប្បាយចិត្តខ្លាំងពេក ហើយមនុស្សស្រីដែលបានស្វាមី ដែលខូចខិលមុនពេលរៀបការ ក៏កុំទាន់ពិបាកចិត្តដែរ។ ព្រោះលើកលោកនេះអ្វីៗ មិនទៀងទាត់នោះទេ ជាពិសេសគឺចិត្ត របស់មនុស្សប្រុសនេះតែម្តង។
យ៉ាងណាមិញ គ្រប់យ៉ាង ស្ថិតក្នុងការសម្រេចចិត្តរបស់អ្នក ថានឹងជ្រើសរើសប្រភេទបុរសមួយណា ធ្វើជាគូប្រចាំជីវិត តែមួយទៀត អ្នកត្រូវចាំថា គ្មានមនុស្សប្រុសណាម្នាក់ ដែលល្អឥតខ្ចោះនោះទេ សំខាន់ គេកែប្រែដើម្បីយើង ឬក៏អត់ ក៏អាស្រ័យលើចិត្តរបស់គេនោះទេ៕