ក្នុងចំណោមទីក្រុងដែលក្តៅបំផុតទាំង ១៥ នៅលើពិភពលោក ក៏មាន ១០ កន្លែងដែលស្ថិតនៅក្នុងប្រទេសឥណ្ឌាដែរ

ឥណ្ឌា៖ យោងតាមគេហទំព័រត្រួតពិនិត្យអាកាសធាតុ El Dorado បានបង្ហាញថា ក្នុងចំណោមទីក្រុងដែលជាកន្លែងក្តៅបំផុតទាំង ១៥ នៅលើពិភពលោកក្នុងរយៈពេល ២៤ ម៉ោងចុងក្រោយនេះ ក៏មាន ១០ កន្លែង គឺស្ថិតនៅក្នុងប្រទេសឥណ្ឌាផងដែរ ជាមួយទីក្រុងដទៃទៀត ដូចជានៅប៉ាគីស្ថាន ដែលជាប្រទេសជិតខាងជាដើម។

តាមប្រភពព័ត៌មានបានបញ្ជាក់ថា នៅក្នុងទីក្រុង Churu នៃរដ្ឋ Rajasthan របស់ប្រទេសឥណ្ឌា បានកត់ត្រាអំពីសីតុណ្ហភាពខ្ពស់បំផុតរបស់ប្រទេសខ្លួន ដែលកើនឡើងរហូតដល់ ៥០,២ អង្សាសេ កាលពីថ្ងៃអង្គារកន្លងផុតទៅនេះ។ ទីក្រុងមួយចំនួនដូចជា ក្រុង Bikaner, ក្រុង Ganganagar និងក្រុង Pilani ក៏ជាទីក្រុងក្តៅចំនួន ៣ ផ្សេងទៀត ដែលស្ថិតនៅក្នុងរដ្ឋ Rajasthan ផងដែរ។ 

ក្រៅពីនេះ ក៏មានទីក្រុងផ្សេងទៀតដែលស្ថិតនៅក្នុងបញ្ជីនៃទីក្រុងដែលក្តៅជាងគេក្នុងពិភពលោកដែលមានដូចជា ទីក្រុង New Delhi សីតុណ្ហភាពកើនដល់ ៤៧,៦ អង្សាសេ, ក្រុង Bikaner មានសីតុណ្ហភាព ៤៧,៤ អង្សាសេ, ក្រុង Ganganagar និងក្រុង Jhansi ស្ថិតនៅសីតុណ្ហភាព ៤៧ អង្សាសេ, ក្រុង Pilani មានសីតុណ្ហភាព ៤៦,៩ អង្សាសេ, ក្រុង Nagpur Sonegaon ៤៦,៨ អង្សាសេ និងសីតុណ្ហភាព ៤៦.៥ អង្សាសេនៅក្នុងទីក្រុង Akola​ និង Maharashtra។

យ៉ាងណាមិញ ក៏មានទីក្រុងមួយចំនួនទៀតក៏កំពុងកើនឡើងកំដៅជាបន្តបន្ទាប់ ដែលធ្វើឲ្យប្រទេស ឥណ្ឌាក្លាយជាប្រទេសមួយដែលមានសីតុណ្ហភាពក្ដៅជាងគេក្នុងពិភពលោក៕

ប្រភព៖ shortpedia