សំណល់គ្រាប់រ៉ុក្កែតរុស្ស៊ី ដែលធ្លាក់​មកបរិយាកាសផែនវិញ បានហោះកាត់ផ្ទៃមេឃប្រទេសអូស្ត្រាលី (មានវីដេអូ)

បរទេស៖ ​អ្នកជំនាញអូស្ត្រាលីម្នាក់បាននិយាយថា ​ដុំបាល់ភ្លើង​ដែល​បានហោះកាត់ផ្ទៃមេឃក្នុងប្រទេសអូស្ត្រាលី ​កាលពីចុងសប្តាហ៍មុននោះ គឺជា​បំណែកសេសសល់នៃគ្រាប់រ៉ុក្កែតរុស្ស៊ី ដែល​បានឆាប់ឆេះ​ ខណៈពេលវាធ្លាក់ចូលក្នុងបរិយាកាសផែនដី​វិញ។

លោក Jonti Horner ដែលជាសាស្រ្តាចារ្យផ្នែកតារាសាស្ត្រនៃសាកលវិទ្យាល័យ Southern Queensland បានថ្លែងថា ពួកយើង​អាចដឹង ថាវាជា​សំណល់គ្រាប់រ៉ុក្កែតធ្លាក់ពីទីអវកាស ដោយសារតែវាហោះក្នុងល្បឿនយឺត ដែលប្រហែល​​៦គីឡូម៉ែត្រក្នុងមួយវិនាទី។ ប៉ុន្តែប្រសិនបើវាជា​បំណែកផ្កាយដុះកន្ទុយ ឬ ជាដុំអាចម៍ផ្កាយ នោះល្បឿនរបស់វានឹង​លឿនជាងនេះឆ្ងាយ​។

សូមបញ្ជាក់ផងដែរថា ​ដុំបាល់ភ្លើង​​​ហោះកាត់ប្រទេសអូស្ត្រាលី​នោះ គឺជាបំណែក​គ្រាប់រ៉ុក្កែត Soyuz-2 ដែលវាត្រូវបានបាញ់បង្ហោះដោយជោគជ័យ ចេញពីមជ្ឈមណ្ឌល Plesetsk Cosmodrome ​ភាគពាយព្យ​ប្រទេសរុស្ស៊ី កាលពីថ្ងៃសុក្រសប្តាហ៍មុន​ ដើម្បីបញ្ជូនផ្កាយរណបយោធាមួយគ្រឿងឡើងទៅកាន់គន្លងតារាវិថី។ ហើយ​សំណល់គ្រាប់រ៉ុក្កែត​នោះទៀតសោធន៍ ​បានធ្លាក់មកផែនដីវិញ ចូលទៅក្នុងមហាសមុទ្រប៉ាស៊ីហ្វិក​៕

សូមទស្សនាវីដេអូខាងក្រោម៖