អេស្ប៉ាញប្រកាសកាន់ទុក្ខ​រយៈពេល១០ថ្ងៃ ដល់អ្នកដែលបានស្លាប់​ដោយជំងឺកាចសាហាវកូវីដ១៩

ម៉ាឌ្រីដ៖ អ្នកនាំពាក្យរដ្ឋាភិបាលលោកស្រី Maria Jesus Montero បាន​ថ្លែងថា រដ្ឋាភិបាលអេស្ប៉ាញបានប្រកាស​ធ្វើពិធីកាន់ទុក្ខជាផ្លូវការរយៈពេល១០ថ្ងៃ ចាប់ពីថ្ងៃពុធតទៅ ដើម្បីជាការគោរពវិញ្ញាណក្ខន្ធដល់មនុស្សជិត៣ម៉ឺននាក់ ដែលបានស្លាប់ដោយសារជំងឺរាតត្បាតនៅក្នុងប្រទេសអេស្ប៉ាញ។

លោកស្រី Maria Jesus Montero បានប្រាប់សន្និសីទសារព័ត៌មានក្រោយកិច្ចប្រជុំគណៈរដ្ឋមន្រ្តីថា ក្នុងអំឡុងពេលកាន់ទុក្ខនេះ ​ទង់ជាតិនឹងត្រូវបង្ហូត​​ឡើង​ត្រឹមពាក់កណ្ដាល​ដង នៅទូទាំងប្រទេសអេស្ប៉ាញ។ ​ហើយពិធីកាន់ទុក្ខ គឺនឹងត្រូវបញ្ចប់ទៅវិញ ដោយមានការរៀបចំពិធីផ្លូវការមួយ ដែលដឹកនាំដោយប្រមុខរដ្ឋ ដើម្បីជាការ​គោរព​ដល់អ្នកស្លាប់​ទាំងអស់នោះ។

គួរឱ្យដឹងដែរថា ចាប់តាំងពីមានការផ្ទុះឡើងនៃករណីឆ្លងជំងឺកូវីដ១៩​នៅចុងខែមករា រហូតមកដល់ពេលនេះ ប្រទេសអេស្ប៉ាញមានអ្នក​ឆ្លងជំងឺសរុប  ២៨៣,៣៣៩នាក់ និងអ្នកស្លាប់ ២៧,១១៧នាក់។ ចំណែក ១៩៦,៩៥៨នាក់ផ្សេងទៀត បានជាសះស្បើយពីជំងឺ​៕