សួតរបស់យើង គឺមានតួនាទីសំខាន់ក្នុងការជួយឲ្យរាងកាយដំណើរការបានល្អ។ ប៉ុន្តែសួតអាចនឹងស្រូបយកសារធាតុមិនល្អមួយចំនួនពីក្នុងខ្យល់ដែលអាចបង្កើនហានិភ័យបញ្ហាផ្លូវដង្ហើមដូចជាជំងឺហឺត រលាកទងសួត និងជំងឺរលាកសួតជាដើម។ វិធីល្អក្នុងការរក្សារសុខភាពសួតឲ្យបានល្អ គឺហាត់ប្រាណជាប្រចាំ និងញ៉ាំអាហារដែលមានសុខភាពល្អ។ ដូចនេះដើម្បីពង្រឹងសុខភាពសួត យើងគួរបញ្ចូលអាហារប៉ុន្មានមុខនេះចូលទៅក្នុងរបបអាហារប្រចាំថ្ងៃ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស១. ផ្លែប៉ោម
អ្នកស្រាវជ្រាវបានឲ្យដឹងពីទំនាក់ទំនងរវាងមុខងារសួតល្អជាមួយនឹងវីតាមីន C វីតាមីន E និងBeta-carotene។ វីតាមីនទាំងនេះសុទ្ធតែមាននៅក្នុងផ្លែប៉ោម ហើយផ្លែប៉ោមក៏មានសារធាតុប្រឆាំងអុកស៊ីតកម្មដែលជួយដល់សុខភាពសួតដែរ។
២. គ្រាប់ Walnut
គ្រាប់ Walnut ជាប្រភពដ៏ល្អសម្រាប់អាស៊ីតខ្លាញ់អូមេហ្គា៣។ ការញ៉ាំគ្រាប់ធញ្ញជាតិនេះអាចជួយប្រឆាំងជំងឺហឺត និងបញ្ហាផ្លូវដង្ហើមផ្សេងទៀត។ អ្នកស្រាវជ្រាវជឿថាអាស៊ីតខ្លាញ់អូមេហ្គា៣ជាសារធាតុប្រឆាំងការរលាកដែលមានប្រសិទ្ធភាពក្នុងការការពារជំងឺរលាក។
៣. ផ្លែប្លូប៊ឺរី (blueberry )
ផ្លែប្លូប៊ឺរីអាចជួយដល់សុខភាពសួតរបស់យើងព្រោះផ្លែនេះសំបូរដោយសារធាតុប្រឆាំងអុកស៊ីតកម្មដូចជាវីតាមីន C ដែលជួយប្រឆាំងនឹងកោសិកាខូចខាតបណ្ដាលមកពីពពួករ៉ាឌីកាល់សេរី។
៤. ផ្កាខាត់ណាខៀវ
ផ្កាខាត់ណាខៀវសំបូរដោយវីតាមីន C carotenoids folate និងphytochemicalsដែលជួយប្រឆាំងនឹងការខូចខាតនៅក្នុងសួត។ ផ្កាខាត់ណាខៀវក៏មានសារធាតុ L-sulforaphane ដែលជួយភ្ញោចកោសិកាក្នុងផលិតហ្សែនប្រឆាំងនឹងការរលាកដើម្បីចៀសវាងបញ្ហាផ្លូវដង្ហើមផ្សេងៗ។
៥. ម្ទេស
សារធាតុ capsaicin នៅក្នុងម្ទេសជួយជំរុញការផលិត និងការពារភ្នាសសើមក្នុងប្រព័ន្ធផ្លូវដង្ហើមផ្នែកខាងលើ និងខាងក្រោមបាន។
៦. ខ្ញី
ខ្ញីមិនត្រឹមតែប្រឆាំងការរលាកទេ នៅអាចជួយកម្ចាត់ជាតិពុលចេញពីក្នុងសួត។ ខ្ញីក៏ជួយបន្ធូរដល់ការស្ទះផ្លូវដង្ហើម និងជួយឲ្យឈាមរត់ទៅកាន់សួតកាន់តែប្រសើរឡើង និងជួយពង្រឹងសុខភាពសួត។
៧. ខ្ទឹមស
ខ្ទឹមសផ្ទុកសារធាតុ flavonoids ដែលជំរុញដល់ការផលិត glutathione។ Glutathione ជួយពង្រឹងការកម្ចាត់ជាតិពុល និងកម្ចាត់សារធាតុបង្កជំងឺមហារីក ដែលនេះអាចធ្វើឲ្យសួតរបស់យើងដំណើរការកាន់តែប្រសើរឡើង។
៨. ទឹក
ទឹកជាមធ្យោបាយល្អមួយក្នុងការបន្សាបជាតិពុលពីក្នុងរាងកាយ។ បន្ថែមពីនេះទៀត សួតស្ងួតអាចប្រឈមនឹងការរលាក។ ដូចនេះហើយយកល្អគួរផឹកទឹកប្រចាំថ្ងៃឲ្យបានគ្រប់គ្រាន់។
៩. ល្មៀត
ល្មៀតមានសារធាតុប្រឆាំងការរលាកដោយមានផ្ទុកសារធាតុ curcumin។ សារធាតុនេះជួយសម្រាលការរលាកនៅនឹងផ្លូវដង្ហើម និងអាការៈណែនដើមទ្រូងបង្កដោយជំងឺហឺត។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
អត្ថបទផ្ដល់សិទ្ធិដោយ Hello Krupet