ថៃ៖ អ្នកស្រាវជ្រាវជាន់ខ្ពស់របស់ថៃ បានអះអាងកាលពីថ្ងៃចន្ទ ទី២៥ ខែឧសភាម្សិលមិញនេះថា ប្រទេសថៃកំពុងធ្វើតេស្ដវ៉ាក់សាំងប្រឆាំងនឹងជំងឺកូវីដ-១៩ ទៅលើសត្វស្វា ដើម្បីទទួលបានវ៉ាក់សាំងមួយប្រភេទ ដែលមានតម្លៃថោកជាងបណ្ដាប្រទេសជឿនលឿនដូចជា អឺរ៉ុប ឬអាមេរិក។ ហើយគេក៏សង្ឃឹមថាវ៉ាក់សាំងនោះ នឹងរួចរាល់នាឆ្នាំ២០២១ខាងមុខនេះផងដែរ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សក្នុងដំណាក់កាលសាកល្បងនោះ ប្រទេសថៃបានធ្វើតេស្ដទៅលើសត្វស្វាចំនួន ១៣ក្បាល ក្រោយពីទទួលបានជោគជ័យចំពោះការធ្វើតេស្តលើសត្វកណ្ដុរកន្លងទៅ។ វ៉ាក់សាំងនោះ បានផលិតឡើង ដោយសហការជាមួយសកលវិទ្យាល័យ Pennsylvania របស់សហរដ្ឋអាមេរិក និងបានផលិតដោយប្រើប្រាស់បច្ចេកវិទ្យាថ្មី mRAN ដែលមិនធ្លាប់មានអ្នកប្រើប្រាស់ដើម្បីផលិតវ៉ាក់សាំងពីមុនឡើយ។ តែយ៉ាងហោចណាស់ មានក្រុមហ៊ុនផលិតឱសថធំៗចំនួន២ រួមមាន Pfiza និង Moderna នៅឯសហរដ្ឋអាមេរិក កំពុងអភិវឌ្ឍវ៉ាក់សាំងរបស់ខ្លួនដោយប្រើប្រាស់បច្ចេកវិទ្យាថ្មីនោះ។
យោងតាមសម្ដីលោកវេជ្ជបណ្ឌិត Kiat Ruxrungtham ប្រធានមជ្ឈមណ្ឌលស្រាវជ្រាវវ៉ាក់សាំងនៃសកលវិទ្យាល័យ ជូឡាឡុងកន បានមានប្រសាសន៍ថា ប្រសិនបើធ្វើតេស្តវ៉ាក់សាំងលើសត្វស្វាជោគជ័យ ថៃគួរតែចាប់ផ្ដើមសាកល្បងវ៉ាក់សាំងនោះទៅលើមនុស្សនាខែតុលាខាងមុខ។
គួរឲ្យដឹងដែរថា បច្ចុប្បន្ននេះមានវ៉ាក់សាំងប្រឆាំងនឹងជំងឺកូវីដ-១៩ ច្រើនជាង ១០០ប្រភេទជុំវិញពិភពលោក ដែលកំពុងស្ថិតក្នុងដំណាក់កាលអភិវឌ្ឍ ហើយយ៉ាងហោចណាស់មានតែ ៨ប្រភេទប៉ុណ្ណោះ ដែលស្ថិតក្នុងដំណាក់កាលសាកល្បងលើមនុស្ស។ នេះបើយោងតាមអង្គការសុខភាពពិភពលោក៕
ប្រភព៖ voanews