ក្រុមអ្នកជំនាញ រក​ឃើញ​ឆ្អឹងនិង​ភ្លុក​ដំរី Mammoth ដែលមានអាយុ​កាលជាង​​១​​ម៉ឺន​ឆ្នាំ​មុន

ម៉ិកស៊ីកូ៖ ក្រុមអ្នកបុរាណវិទូ បានធ្វើកំណាយរកឃើញ​ឆ្អឹង និង​ភ្លុក​ដំរី Mammoth ជាង៦០ក្បាល ​នៅក្នុងការដ្ឋានសាងសង់ព្រលានយន្តហោះថ្មីមួយកន្លែង ដែលមានចំងាយប្រហែល ៥០គីឡូម៉ែត្រ ភាគខាងជើងឈៀងខាងកើតនៃទីក្រុងម៉ិកស៊ីកូ ប្រទេសម៉ិកស៊ីក ។

យោងតាមការសិក្សារបស់អ្នក​បុរាណវិទូមកពីវិទ្យាស្ថានជាតិនរវិទ្យានិងប្រវត្តិសាស្ត្រប្រទេសម៉ិកស៊ិកបាន​ឱ្យដឹងថា ដំរី​ផុតពូជ Mammoth អាចមានកំពស់រហូតទៅដល់ ៤ម៉ែត្រ និងមានទម្ងន់ប្រមាណ ១១តោន រួមជាមួយនឹងភ្លុកយ៉ាងវែង​។ ហើយពួកវាបានស្លាប់ដោយសារការប្រមាញ់​ ពីសំណាក់ក្រុមព្រានព្រៃកាលពីសម័យនោះ។

ការរកឃើញចំនួន​ដ៏ច្រើននៃផូស៊ីលដំរី Mammoth នេះ នឹងផ្តល់ឱ្យអ្នកវិទ្យាសាស្រ្តនូវឱកាសដ៏កម្រ ដើម្បីធ្វើការសិក្សាពីបុព្វហេតុ ដែលបណ្តាលឱ្យចំនួនរបស់ពួកវាមានការថយចុះយ៉ាងខ្លាំង​ រហូតឈានដល់ការផុតពូជ កាលពីជាង ១០,០០០ ឆ្នាំមុន។ ​

គួរឱ្យដឹងដែរថា កាលពីខែតុលាឆ្នាំ ២០១៩កន្លងទៅ នៅទីតាំងដដែលនេះ ក្រុមអ្នកជំនាញធ្លាប់បានរកឃើញ គ្រោងឆ្អឹងសត្វ​ ក៏ដូច​ជារណ្តៅសំរាប់ធ្វើជាអន្ទាក់​ ដែលត្រូវបានជីកដោយមនុស្សកាលពី ១៥,០០០ឆ្នាំមុន ដើម្បីចាប់​ដំរី Mammoth និងសត្វជាច្រើនទៀត។

សូមទស្សនាវីដេអូខាងក្រោម៖