បរទេស៖ ដូចដែលប្រិយមិត្តអ្នកអាន បានដឹងស្រាប់ហើយថា ស្ថានភាពនៃជំងឺ​ឆ្លងកូវីដ១៩ ហាក់មិនទាន់ធូរស្រាលនៅឡើយទេ ហើយប្រសិនបើយើងក្រឡេកទៅមើលប្រទេស​ជាច្រើននៅទូទាំងពិភពលោក គឺយើងអាច​ឃើញថា ជំងឺដ៏កាចសាហាវនេះ បានឆក់យកជីវិតមនុស្សរាប់ម៉ឺននាក់ ក្នុងចំណោមអ្នកឆ្លងជំងឺ​រាប់លាននាក់។

ជាក់ស្ដែង បើយោងទៅតាមគេហទំព័រ Worldometer គិតត្រឹមម៉ោង ​៩ៈ០០នាទីព្រឹក ថ្ងៃ​​សុក្រ ទី២២ ខែឧសភា ឆ្នាំ២០២០នេះ ចំនួនអ្នកឆ្លងសរុបទូទាំងពិភពលោក បានកើនដល់ ៥,១៩៤,០៩៩ នាក់ ហើយក្នុងនោះដែរ មានមនុស្សចំនួន ៣៣៤,៦១៦ នាក់បានស្លាប់បាត់បង់ជីវិត និង ២,០៨០,៩២៣ នាក់ផ្សេងទៀត បានទទួលការព្យាបាលជាសះស្បើយ​។

​​ជំងឺកូវីដ១៩​ ​បាន​ផ្ទុះឡើងជាលើកដំបូងនៅក្នុងទីក្រុងវូហាន ខេត្តហ៊ូប៉ី ប្រទេសចិន ហើយក្រុមអ្នកជំនាញជាច្រើន បានជឿជាក់ថា ជំងឺដ៏កាចសាហាវនេះ មានប្រភពចេញពីទីផ្សារលក់សាច់សត្វមួយកន្លែងរបស់ទីក្រុងវូហាន។ ហើយរហូតមកទល់ពេលនេះ ​ជំងឺ​កូវីដ១៩ បានបន្តឆ្លងរាលដាល និងសម្លាប់មនុស្សជារៀងរាល់ថ្ងៃ ខណៈដែលក្រុមអ្នកវិទ្យាសាស្ត្រ​ទូទាំងពិភពលោក នៅមិនទាន់រកឃើញវ៉ាក់សាំងការពារនៅឡើយទេ។

គួរឱ្យដឹងផងដែរថា បើយោងតាមគេហទំព័រខាងលើ ​បានបង្ហាញ​ឱ្យឃើញថា ជំងឺ​ដ៏កាចសាហាវ​​នេះ បាន​ឆ្លងរាលដាលទៅ​ដល់ប្រទេស និងដែនដីសរុបចំនួន ២១៣ ជុំវិញពិភពលោក ដោយក្នុងនោះសហរដ្ឋអាមេរិក និងរុស្ស៊ី ​គឺជាប្រទេសដែលមានករណីឆ្លងច្រើនជាងគេបំផុត។ ហើយស្របពេលដែលស្ថានភាពនៃជំងឺនេះ ហាក់មិនទាន់ធូរស្បើយនៅឡើយ ប្រទេសក្នុងទ្វីបអឺរ៉ុបជាច្រើន បានសម្រេចបើកទ្វារប្រទេស ក្នុងគោលបំណងស្តាសេដ្ឋកិច្ចជាតិឡើងវិញ៕

ទីបញ្ចុះសពអ្នកស្លាប់ដោយជំងឺកូវីដ១៩ របស់ប្រទេសប្រេស៊ីល
ទីបញ្ចុះសពអ្នកស្លាប់ដោយជំងឺកូវីដ១៩ របស់ប្រទេសប្រេស៊ីល

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]

ចង់ក្លាយជាអ្នកសរសេរក្រៅម៉ោងមានប្រាក់ចំណូលសូមចុះឈ្មោះទីនេះ