តៃប៉ិ៖ ទីភ្នាក់ងារសារព័ត៌មាន Reuters រាយការណ៍ថា រដ្ឋាភិបាលសហរដ្ឋអាមេរិក បានជូនដំណឹងដល់សភាស្តីពីលទ្ធភាពក្នុងការលក់មីស៊ីលទំនើប Torpedo ជាប្រភេទមីស៊ីលប្រើជាមួយនឹងវានាមុជទឹក ទៅឱ្យកោះតៃវ៉ាន់ ដែលមានតំលៃប្រហែល ១៨០ លានដុល្លារ ក្នុងគោលបំណងបង្កើនសមត្ថភាពការពារសន្តិសុខ និងរក្សាស្ថេរភាពជាតិ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សនៅក្នុងសេចក្តីថ្លែងការណ៍មួយកាលពីថ្ងៃពុធ ទីភ្នាក់ងារនៃកិច្ចសហប្រតិបត្តិការសន្តិសុខការពារជាតិរបស់អាមេរិកបានបញ្ជាក់ថា ក្រសួងការបរទេសសហរដ្ឋអាមេរិក បានអនុម័តថានឹងលក់មីស៊ីល MK-48 Mod6 ចំនួន ១៨គ្រាប់ ក្នុងតម្លៃ ១៨០លានដុល្លារ ទៅឱ្យកោះតៃវ៉ាន់។ ប៉ុន្តែការធ្វើបែបនេះ បានធ្វើឱ្យប្រទេសចិនកាន់តែក្តៅស្លឹកត្រចៀក ព្រោះថាប្រទេសចិន មិនចង់ឱ្យសហរដ្ឋអាមេរិកលក់អាវុធ ក៏ដូចជាធ្វើទំនាក់ទំនងជាមួយកោះតៃវ៉ាន់ឡើយ។
គួរបញ្ជាក់ផងដែរថា ការប្រកាសនេះបានធ្វើឡើងនៅថ្ងៃតែមួយ ដែលប្រធានាធិបតីតៃវ៉ាន់លោកស្រី Tsai Ing-wen បានស្បថចូលកាន់តំណែងជាប្រធានាធិបតីអាណត្តិទី ២ របស់លោកស្រី។ ហើយក្នុងថ្ងៃឡើងកាន់តំណែងនោះដែរ លោកស្រីបានប្រកាសបដិសេធដាច់ខាត ចំពោះការទាមទារអធិបតេយ្យភាពរបស់ចិន។ ចំណែកឯប្រទេសចិន ក៏បានធ្វើការឆ្លើយតបផងដែរថា ការបង្រួបបង្រួមគ្នា គឺមិនអាចជៀសរួចឡើយ ហើយប្រទេសចិន ក៏មិនយល់ព្រមឱ្យកោះតៃវ៉ាន់ ប្រកាសខ្លួនជាកោះឯករាជ្យដែរ៕