ខ្សែប្រយុទ្ធរូបនេះ អាចនឹងចាកចេញពី Juventus ក្រោយបាត់បង់នាទីលេងកាន់តែច្រើន ខណៈលីគល្បីមួយចាំស្វាគមន៍ជានិច្ច

ក្របខណ្ឌលីគកំពូលអាមេរិក អាចជាគោលដៅដ៏មានសក្តានុពលមួយរបស់ខ្សែប្រយុទ្ធជើងចាស់ Gonzalo Higuain ស្របពេលដែលអនាគតរបស់គេកាន់តែមិនច្បាស់លាស់ជាមួយក្លឹបជើងឯក អ៊ីតាលី Juventus ទោះបីជាលោក Maurizio Sarri គ្រូបង្វឹកសំណព្វចិត្តរបស់គេកំពុងនៅដឹកនាំក៏ដោយ។

យោងតាមរបាយការណ៍របស់ Calciomercato បានឱ្យដឹងថា ក្លឹបសេះបង្កង់ Juventus កំពុងសម្លឹងមើលខ្សែប្រយុទ្ធជួរមុខថ្មីមួយរូបនារដូវក្តៅនេះ ក្នុងនោះមានកីឡាករ Mauro Icardi កីឡាករ Arkadiusz Milik និងកីឡាករ Raul Jimenez កំពុងស្ថិតក្នុងជម្រើសរបស់ក្លឹប។

ក្លឹបជើងខ្លាំងរបស់លីគកំពូលអាហ្សង់ទីន River Plate បានជាប់ពាក់ព័ន្ធក្នុងការផ្ទេរយកខ្សែប្រយុទ្ធជម្រើសជាតិអាហ្សង់ទីនរូបនេះជាយូរមកហើយ ប៉ុន្តែតម្លៃខ្លួនរបស់គេនៅតែជាឧបសគ្គសម្រាប់ River Plate។

ទោះជាយ៉ាងណា លីគកំពូលអាមេរិកនៅតែជាជម្រើសទី១សម្រាប់រូបគេ ខណៈក្លឹបនៅអាមេរិកតែង តែសម្លឹងមើលកីឡាករល្បីឈ្មោះមកចូលរួម ស្របពេលដែលកីឡាករល្បីឈ្មោះមួយចំនួនក៏បានចាកចេញក្នុងនោះមាន កីឡាករ Wayne Rooney និងកីឡាករ Zlatan Ibrahimovic ជាដើម៕

ប្រភព៖ Goal