ក្រសួងទេសចរណ៍កម្ពុជា ថ្មីៗបានអំពាវនាវដល់ម្ចាស់សណ្ឋាគារ និងសេវាកម្មស្នាក់នៅទេសចរណ៍ទាំងអស់នៅកម្ពុជា យកឱកាសកូវីដ១៩ មកកែលម្អគុណភាពឲ្យប្រសើរឡើង ដើម្បីត្រៀមខ្លួនពេលវិបត្តិកូវីដ១៩ បញ្ចប់នៅពេលខាងមុខនេះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សក្រសួងទេសចរណ៍ បានបង្ហាញនូវសុទិដ្ឋិនិយមថា វិស័យទេសចរណ៍កម្ពុជា នឹងវិលត្រឡប់ទៅរកភាពប្រសើរឡើងវិញ ក្រោយវិបត្តិនៃការរីករាលដាលជាសកល នៃវីរុសកូវីដ១៩ ស្របតាមយុទ្ធនាការ «Stay Home Today, Travel Tomorrow»។ ក្នុងបរិបទនេះមន្ត្រីរដ្ឋាភិបាលថា ភ្ញៀវទេសចរជាតិ និងអន្តរជាតិ នឹងមានតម្រូវការកាន់តែខ្ពស់លើគុណភាពសេវាកម្ម ជាពិសេសការយកចិត្តទុកដាក់ចំពោះអនាម័យ សុវត្ថិភាព សេវាកម្ម និងផលិតផលទេសចរណ៍។
ក្នុងដំណាក់កាលរង់ចាំស្ថានភាពថយចុះនៃកូវីដ១៩ ក្រសួងទេសចរណ៍ បានប្រាប់ឲ្យម្ចាស់សណ្ឋាគារ និងសេវាកម្មស្នាក់នៅទេសចរណ៍ទាំងអស់ត្រៀមលក្ខណៈសម្បត្តិ ដោយពង្រឹងគុណភាពសេវាកម្មរបស់ខ្លួនឱ្យបានកាន់តែប្រសើរជាងមុន និងលើកទឹកចិត្តដល់ទីតាំងសណ្ឋាគារ និងសេវាកម្មស្នាក់នៅទេសចរណ៍ទាំងឡាយ ដែលបានធ្វើប្រតិបតិ្តការអាជីវកម្មចាប់ពី១០ឆ្នាំឡើងទៅ គួរឆ្លៀតក្នុងឱកាស នៃវិបត្តិជំងឺឆ្លងនេះ កែលម្អជួសជុល ក្នុងករណីជាយថាហេតុណាមួយ ដើម្បីបង្កើនគុណភាព និងដូចជាលក្ខណៈសម្បត្តិដើម្បីអាចបង្កើនលទ្ធភាពទទួលបានការវាយតម្លៃចំណាក់ថ្នាក់ សណ្ឋាគារ និងសេវាកម្មស្នាក់នៅទេសចរណ៍ ក្នុងកម្រិតប្រសើរជាងមុន (កើនលំដាប់ផ្កាយ)។
ជាការកត់សម្គាល់ ក្រៅពីការអំពាវនាវឲ្យមានការកែលម្អគុណភាពសេវាកម្មស្នាក់នៅ អនាម័យ និងសុវត្ថិភាពពីសំណាក់ក្រសួងទេសចរណ៍ កន្លងមករដ្ឋបាលរាជធានីភ្នំពេញ ថែមទាំងបានព្រមានបិទអាជីវកម្មភោជនីយដ្ឋាន និងអាហារដ្ឋានទាំងឡាយណា ដែលមិនគោរពតាមការណែនាំរបស់ក្រសួងសុខាភិបាលស្ដីពី ផែនការទប់ស្កាត់ការរីករាលដាលនៃជំងឺកូវីដ-១៩ (Covid-19) បើទោះកម្ពុជាមិនមានករណីឆ្លងជំងឺកូវីដ១៩ថ្មីក៏ដោយ៕