សម្តេចនាយករដ្ឋមន្ត្រី ហ៊ុន សែន នៅថ្ងៃ ១៥ ឧសភានេះ បានឯកភាពឲ្យបន្តការពន្យារពេលបើកសាលារៀន ទាំងគ្រឹះស្ថានសិក្សារដ្ឋ និងឯកជនដើម្បីបង្ការការផ្ទុះឡើងសារជាថ្មីនៃជំងឺកូវីដ១៩ ដោយលើកឡើងថា ជំងឺនេះនៅតែមានហានិភ័យខ្ពស់នៅឡើយ ហើយអាចនឹងផ្ទុះឡើងវិញ។ នេះបើតាមការផ្សាយពីទំព័រហ្វេសប៊ុករបស់វិទ្យុមិត្តភាពកម្ពុជា-ចិននៅថ្ងៃដដែល។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សតាមការផ្សាយដដែលបន្ថែមថា ក្នុងពិធីបើកកិច្ចប្រជុំគណៈរដ្ឋមន្ត្រីនាព្រឹកថ្ងៃសុក្រនេះ សម្តេចនាយករដ្ឋមន្ត្រីបានមានប្រសាសន៍ថា ការស្នើសុំណាមួយដែលឲ្យបើកសាលារៀនឡើងវិញនោះមិនទាន់អាចប្រញាប់ប្រញាល់បានឡើយ។ សម្តេចថា គួរឲ្យបន្តពន្យាការបើកសាលាមួយរយៈទៀតធ្វើយ៉ាងណាឲ្យជីវិតបានរស់គង់វង្សសិន។
សម្តេចនាយករដ្ឋមន្ត្រីបន្តថា បើសិនជាបើកសាលានៅពេលនេះ ជំងឺកូវីដ១៩ អាចឆ្លងចូលសាលា នោះវាស្មើនឹងឆ្លងចូលសហគមន៍ហើយ មានន័យថាការឆ្លងនេះចូលទៅក្នុងក្រុមងាយរងគ្រោះបំផុត ខណៈស្ថានភាពបច្ចុប្បន្ន ជីវភាពរបស់ប្រជាជនស្ទើរតែវិលត្រឡប់មករកភាពល្អប្រសើរឡើងវិញហើយនោះ។
ការសម្រេចឲ្យពន្យារពេលបើកសាលានេះ តបតាមសំណើរមួយរបស់រដ្ឋមន្ត្រីក្រសួងអប់រំ លោក ហង់ជួន ណារ៉ុន។ កន្លងទៅរដ្ឋមន្ត្រីរូបនេះ បានសរសេរលិខិតមួយជូនសម្តេច ហ៊ុន សែន កាលពីថ្ងៃទី១២ ឧសភា អំពីស្ថានការនៅកម្ពុជា ដោយលោក ហង់ជួន ណារ៉ុន ថាមិនទាន់អាចបើកដំណើរការសាលារៀនឡើងវិញបានឡើយ បើទោះមានគ្រឹះស្ថានសិក្សាមួយចំនួន បានស្នើសុំឲ្យមានការអនុញ្ញាតិបើកសាលារៀនឡើងវិញនៅសប្តាហ៍ទី៤នៃខែឧសភា ឬដើមខែមិថុនាឆ្នាំ២០២០ ឬពេលវេលាណាមួយខាងមុខក៏ដោយ។
សូមបញ្ជាក់ថា មកទល់ថ្ងៃ ១៥ ឧសភានេះ កម្ពុជាមានករណីព្យាបាលជាសះស្បើយនូវកូវីដ១៩ ចំនួន ១២១នាក់ហើយ នៅសល់តែម្នាក់ទៀតប៉ុណ្ណោះដែលកំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត។
ជាការកត់សម្គាល់ ដោយឃើញស្ថានភាពប្រសើរឡើងបែបនេះ ទើបគ្រឹះស្ថានសិក្សាមួយចំនួន បានស្នើសុំក្រសួងអប់រំឲ្យមានការអនុញ្ញាតិបើកសាលារៀនឡើងវិញ (ខណៈការតម្រូវឲ្យវ៉ាកងតូចមុនកាលកំណត់ត្រូវរដ្ឋាភិបាលបញ្ជាតាំងពីថ្ងៃ ១៤ ខែមីនា ដោយសារកាលនោះស្ថានភាពកូវីដ១៩ កាន់តែផ្ទុះខ្លាំង)។ ប៉ុន្តែជាការឆ្លើយតប រដ្ឋមន្ត្រីក្រសួងអប់រំ លោក ហង់ជួន ណារ៉ុន ថាមិនទាន់អាចបើកដំណើរការសាលារៀនឡើងវិញបានឡើយ ខណៈសម្តេចនាយករដ្ឋមន្ត្រី ហ៊ុន សែន ក៏បានឯកភាពឲ្យបន្តពន្យារពេលបើកសាលាទាំងគ្រឹះស្ថានសិក្សារដ្ឋ និងឯកជនផងដែរ៕