វិចិត្រករពិការជនជាតិអុីរ៉ង់ម្នាក់ឈ្មោះ Fateme Hamami ដែលមានជម្ងឺខ្វិន ៨៥% នៃដងខ្លួនរបស់នាង បានគូររូបពីរសន្លឹកដែលមួយសន្លឹកគឺ Cristiano Ronaldo និងមួយសន្លឹកទៀតគឺ Lionel Messi ដោយប្រើជើងស្តាំរបស់នាង។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សLionel Messi និង Cristiano Ronaldo ពិតជាកំពូលកីឡាករលំដាប់ពិភពលោក ដែលត្រូវបានគេទទួលស្គាល់នៅគ្រប់ទិសទីទាំងអស់។ អ្នកគាំទ្ររបស់ពួកគេមានច្រើនណាស់ ហើយជារឿយៗរូបភាពជាច្រើនបានបង្ហោះលើអុីនធឺរណែត ដែលអ្នកគាំទ្រនៅតាមតំបន់ដាច់ស្រយ៉ាលបានបង្ហាញពីក្តីស្រឡាញ់របស់ពួកគេ ចំពោះកំពូលកីឡាករទាំងពីរនាក់នេះ។
ឥឡូវនេះ រូបភាពមិនគួរឱ្យជឿទាំងពីររបស់ Messi និង Ronaldo ដែលបានគូរដោយវិចិត្រករពិការខាងលើនេះ ត្រូវបានដាក់បញ្ចូលក្បែរគ្នា ។ វិចិត្រករ ដែលមានអ្នកគាំទ្រជាង ១០ ម៉ឺននាក់នៅលើបណ្តាញសង្គម Instagram បានចែករំលែករូបភាពពីរសន្លឹកខាងលើនេះនៅលើគណនីរបស់នាង តាមរយៈ Story របស់ Instagram ដែលធ្វើឱ្យអ្នកគាំទ្រមានភាពភ្ញាក់ផ្អើលជាខ្លាំង។
Hamami មានជំងឺខ្វិន ៨៥% នៃដងខ្លួននាង ហើយខ្វះចលនាលើរាងកាយ។ ទោះបីជាមានការប្រឈមទាំងអស់នេះក៏ដោយ ក៏នាងចេះគូររូបដោយប្រើជើងស្តាំរបស់នាងផងដែរ។ ស្នាដៃថ្មីៗរបស់នាងរួមមានរូបរបស់កំពូលតារាឆ្នើមរបស់ Juventus និងរូបប្រធានក្រុម Barcelona ។
វាមិនមែនជាលើកទីមួយទេ ដែល Hamami បានចែកចាយរូបថតរបស់តារាល្បីៗ ។ នាងធ្លាប់បានគូររូប Ronaldo មួយទៀតកាលពីមុន និងបានបង្ហាញពីក្តីស្រឡាញ់របស់នាងចំពោះកីឡាកររូបនេះ។ នាងបានថ្លែងលើគណីរបស់នាងថា៖ “ខ្ញុំកំពុងគូរមុខរបស់ Cristiano Ronaldo ។ មិត្តភក្តិជាទីស្រឡាញ់របស់ខ្ញុំ និងខ្ញុំពិតជាស្រឡាញ់ Ronaldo ខ្លាំងណាស់ ហើយខ្ញុំក៏ស្រឡាញ់រូបគំនូរនេះខ្លាំងណាស់ផងដែរ។ ខ្ញុំចង់ឱ្យ Ronaldo បានឃើញរូបគំនូរ និងគាំទ្ររូបគំនូរបស់ខ្ញុំនេះផងដែរ” ។
នៅពេលនោះ Ronaldo គឺជាកីឡាកររបស់ក្លិប Real Madrid នៅឡើយ ហើយនៅពេលគំនូររបស់ Hamami ត្រូវបានគេចែកចាយតាមបណ្តាញសង្គមជាច្រើន ក៏ការិយាល័យកណ្តាល La Liga នៅទីក្រុង Madrid បានសរសេរលិខិតថ្លែងអំណរគុណនាងចំពោះគំនូរនេះផងដែរ។
សូមបញ្ជាក់ផងដែរថា Ronaldo និង Messi ជិតវិលត្រលប់ទៅលើទីលានវិញហើយ។ បើទោះបីជាអេស្ប៉ាញ និងអុីតាលីស្ថិតក្នុងចំណោមប្រទេសដែលរងគ្រោះខ្លាំងជាងគេនៅទ្វីបអឺរ៉ុបដោយសារជំងឺឆ្លងសកល Covid-19 ក៏ដោយ ក៏រដ្ឋាភិបាលរបស់ពួកគេបានអនុញ្ញាតិឱ្យក្លិបទាំងអស់អាចបន្តរដូវកាលទៅមុខ ដោយចាប់ផ្តើមឱ្យកីឡាករទាំំងអស់បានចូលហ្វឹកហាត់វិញ។
ចំពោះក្របខ័ណ្ឌ Serie A របស់អុីតាលី និង La Liga របស់អេស្ប៉ាញ កំពុងសំឡឹងមើលពីពេលវេលានៃការចាប់ផ្តើមឡើងវិញនៅខែមិថុនានេះ។ ថ្មីៗនេះ Ronaldo បានវិលត្រឡប់មកពីប្រទេសព័រទុយហ្កាល់ ដែលជាប្រទេសកំណើតរបស់គាត់ ដើម្បីទៅកាន់ប្រទេសអុីតាលីវិញដោយយន្ដហោះឯកជនរបស់គាត់ បន្ទាប់ពីក្លិប Juventus បានប្រកាសពីការសម្រេចចិត្តដើម្បីចាប់ផ្តើមការហ្វឹកហាត់របស់កីឡាករ មុនពេលការចាប់ផ្តើមឡើងវិញនៃក្របខ័ណ្ឌ Serie A ៕