អាមេរិក៖ របាយការណ៍គ្រោះថ្នាក់ដែលត្រូវបានចេញផ្សាយកាលពីពេលថ្មីៗ ទាក់ទងនឹងការប្រទះគ្នារវាងយន្តហោះកងទ័ពជើងទឹកអាមេរិក និងយានមិនស្គាល់អត្តសញ្ញាណមួយ បានបង្ហាញព័ត៌មានលម្អិតថ្មីៗ អំពីស្ថានភាពដ៏ចម្លែក ដែលទទួលបានការចាប់អារម្មណ៍ នៅមន្ទីរបញ្ចកោណ ហើយបានប្រកាសជាផ្លូវការ និងបានចេញវីដេអូចំនួនបី កាលពីចុងខែមុន។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សរបាយការណ៍មួយដែលបានពិពណ៌នាអំពីឧប្បត្តិហេតុមួយ កាលពីថ្ងៃទី២៦ ខែមីនា ឆ្នាំ២០០៤ បាននិយាយថា៖ «យានមិនស្គាល់អត្តសញ្ញាណហាក់ដូចជាមានទំហំតូច ប្រហែលនឹងវ៉ាលីដាក់អីវ៉ាន់ និងមានពណ៌ទឹកប្រាក់។»
របាយការណ៍នោះបានបន្ថែមថា ក្នុងពេលជួបប្រទះ យន្តហោះចម្បាំងមួយគ្រឿងរបស់កងទ័ពជើងទឹកអាមេរិក F/A-18 បានស្ថិតនៅចម្ងាយត្រឹមតែ៣០៤ម៉ែត្រប៉ុណ្ណោះ ពីយានចម្លែកមួយនោះ ប៉ុន្តែបែរជាមិនអាចកំណត់អត្តសញ្ញាណរបស់វាបាន។
អ្នកបើកយន្តហោះចម្បាំងរបស់កងទ័ពជើងទឹកអាមេរិក បានប៉ុនប៉ងទាក់ទងជាមួយយានមួយនោះឡើងវិញ ប៉ុន្តែមិនអាចធ្វើអ្វីបានឡើយ។ សារពត៌មាន CNN ទទួលបានឯកសារពីមជ្ឈមណ្ឌលសុវត្ថិភាពកងទ័ពជើងទឹក ដែលកាលពីមុនមានតែមន្ត្រីផ្លូវការប៉ុណ្ណោះ ដែលអាចពិនិត្យមើល។
កាលពីចុងខែមុន មន្ទីរបញ្ចកោណបានចេញជាផ្លូវការ នូវវីដេអូខ្លីចំនួនបី ដែលបង្ហាញពី «យានមិនស្គាល់អត្តសញ្ញាណនៅលើអាកាស» ដែលកាលពីមុន ធ្លាប់ត្រូវបានបញ្ចេញរួចម្ដងមកហើយ ដោយក្រុមហ៊ុនឯកជនមួយ។ វីដេអូបានបង្ហាញពីអ្វី ដែលមើលទៅហាក់ដូចជាវត្ថុហោះ ដែលមិនអាចកំណត់អត្តសញ្ញាណបាន ហើយវាកំពុងហោះហើរយ៉ាងលឿន ខណៈដែលត្រូវថតជាប់ដោយកាំមេរ៉ាអាំងប្រា៕