ប្រទេសកំពុងបិទទ្វារ ស្រាប់តែពលករចំណាកស្រុក១៤នាក់ នាំគ្នាលួចធ្វើដំណើរដោយសំងំនៅក្នុងឡានក្រឡុកសុីម៉ង់ត៍ (មានវីដេអូ)

ឥណ្ឌា៖ ថ្មីៗនេះ ពលករចំណាកស្រុក១៤នាក់ បាននាំគ្នាលួចធ្វើដំណើរ ដោយសំងំក្នុងឡានក្រឡុកសុីម៉ង់ត៍ ខណៈពេលប្រទេសឥណ្ឌាកំពុងបិទទ្វារ ដើម្បីទប់ស្កាត់ការរីករាលដាលនៃជំងឺកូវីដ-១៩។

ប្រភពព័ត៌មានឥណ្ឌាមួយបានឲ្យដឹងថា នៅក្នុងថ្ងៃនោះ ពលករចំណាកស្រុកទាំង១៤នាក់ បានព្យាយាមធ្វើដំណើរពីទីក្រុង Nashik ឆ្ពោះទៅកាន់ទីក្រុង Lucknow ដែលមាន​រយៈចម្ងាយចំនួន១,២០០គីឡូម៉ែត្រ។ យ៉ាងណាមិញ កំឡុងពេលពួកគេកំពុងធ្វើដំណើរតាមដងផ្លូវ ស្រាប់តែមានក្រុមប៉ូលិសយាមល្បាត បានឃាត់ឲ្យឈប់ ដើម្បីធ្វើការសាកសួរ និងត្រួតពិនិត្យដោយភាពងឿងឆ្ងល់ ព្រោះតែប្រទេសឥណ្ឌាបានដាក់បម្រាមលើការសាងសង់នានាទូទាំងប្រទេស។

ខណៈពេលកំពុងសាកសួរបុរសចំនួន៤នាក់ដែលនៅកាប៊ីនផ្នែកខាងមុខនៃឡាន ប៉ូលិសបានឮសូរសំឡេងជជែកគ្នាយ៉ាងអ៊ូអរចេញពីក្នុងកន្លែងក្រឡុកសុីម៉ង់ត៍។ ហើយក្រោយមក ប៉ូលិសបានបញ្ជាឲ្យអ្នកបើកបររថយន្ដបើកសន្ទះក្រឡុកសុីម៉ង់ត៍ចេញ ទើបប្រទះឃើញពលករទាំង១៤នាក់សំងំនៅក្នុងនោះ។

យ៉ាងណាមិញ ពលករទាំង១៤នាក់ និងបុរស៤នាក់ទៀត ត្រូវបានប៉ូលិសចាប់ឃាត់ខ្លួន យកទៅធ្វើតេស្ដរកជំងឺកូវីដ-១៩ តែលទ្ធផលចេញមកគឺអវិជ្ជមានទាំងអស់។ ចំណែកឯឡានក្រឡុកសុីម៉ងត៍វិញ ត្រូវបានអាជ្ញាធរតំបន់រឹបអូសយកទៅរក្សាទុកផងដែរ៕

សូមទស្សនារូបភាពនិងវីដេអូខាងក្រោម៖