សិង្ហបុរី៖ ស្របពេលដែលស្ថានភាពជំងឺកូវីដ១៩ ក្នុងប្រទេសសិង្ហបុរី នៅមិនទាន់ធូរស្រាលខ្លាំងនៅឡើយ រដ្ឋាភិបាលប្រទេសនេះ នៅតែបន្តចាត់វិធានការតឹងរ៉ឹង និងស្នើរសុំដល់ពលរដ្ឋខ្លួនទាំងអស់ ត្រូវរក្សាអនាម័យឱ្យបានខ្ជាប់ខ្ជួន ដ៏ដូចជារក្សាគម្លាតឆ្ងាយពីគ្នា ក្នុងគោលបំណងជៀសវាង ការចម្លងជំងឺពីមនុស្សម្នាក់ទៅមនុស្សម្នាក់ទៀត។ ទន្ទឹមគ្នានេះដែរ ដើម្បីចូលរួមចំណែកទប់ស្កាត់ការចម្លងជំងឺដ៏កាចសាហាវនេះ ក្រុមហ៊ុនបច្ចេកវិទ្យា Boston Dynamics បានបង្កើតសុនខយន្ដពិសេសមួយ ដើម្បីដើរប្រាប់ប្រជាជនកុំឱ្យមានការជួបជុំគ្នា ខណៈពេលជំងឺកំពុងរាតត្បាត។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សសុនខយន្ដពិសេសមួយនេះ មានឈ្មោះថា SPOT វាត្រូវបានក្រុមហ៊ុន Boston Dynamics ដាក់ឱ្យដំណើរការជាលើកដំបូងនៅឧទ្យានមួយ ក្នុងប្រទេសសិង្ហបុរី កាលពីថ្ងៃសុក្រ ដោយកំណត់ឲ្យវាដំណើរការ សរុបរយៈពេល២សប្ដាហ៍។ សុនខយន្ដនេះ មានបំពាក់មកជាមួយនូវសេនស័រ និងកាមេរ៉ា ដែលអាចឱ្យវាដើរជៀសឧបសគ្គនៅខាងមុខ ក៏ដូចជារាប់ចំនួនមនុស្សនៅទីតាំងណាមួយបាន ម្យ៉ាងវិញទៀត វាក៏មានឧបករណ៍បំពងសម្លេង ដែលនិយាយក្រើនរំលឹកឱ្យប្រជាជន ត្រូវរក្សាគម្លាតយ៉ាងហោចណាស់មួយម៉ែត្រ ដើម្បីការពារសុវត្ថិភាពផ្ទាល់ខ្លួនពីការឆ្លងជំងឺ។
សូមជម្រាបផងដែរថា កាលពីពេលកន្លងមក សុនខយន្ដប្រភេទនេះ ក៏ធ្លាប់ត្រូវបានប្រើប្រាស់នៅក្នុងមន្ទីរពេទ្យបណ្តោះអាសន្នដែរ ដោយគេប្រើវាសំរាប់ដឹកជញ្ជូនថ្នាំយកទៅឱ្យអ្នកជំងឺ ក្នុងគោលបំណងកាត់បន្ថយការធ្វើទំនាក់ទំនងផ្ទាល់រវាងគ្រូពេទ្យនិងអ្នកជំងឺ ក៏ដូចជាអាចឱ្យគ្រូពេទ្យមានពេលវេលាគ្រប់គ្រាន់ ដើម្បីទៅព្យាបាលអ្នកជំងឺស្ថិតក្នុងស្ថានភាពធ្ងន់ធ្ងរដែរ៕
សូមទស្សនាវីដេអូខាងក្រោម៖