​ក្រោយស្ងប់ស្ងាត់ជំងឺកូវីដ១៩ ពេលនេះកូរ៉េខាងត្បូង ចាប់ផ្តើមធ្វើតេស្តមីស៊ីលផ្លោងថ្មី ដោយ​បំពាក់ក្បាលគ្រាប់ធុនធ្ងន់

សេអ៊ូល៖ ទីភ្នាក់ងារសារព័ត៌មានក្នុងស្រុក EDaily របស់ប្រទេសកូរ៉េខាងត្បូង ​បាន​រាយការណ៍កាលពីថ្ងៃព្រហស្បតិ៍ថា យោធាកូរ៉េខាងត្បូងបានធ្វើតេស្តសាកល្បង​មីស៊ីលផ្លោងថ្មីមួយប្រភេទ ដែលមានសមត្ថភាព​អាចបំពាក់ក្បាលគ្រាប់ទម្ងន់រហូតដល់ទៅ ២ តោន​។

ប្រភពដដែលបានបន្តថា មីស៊ីល Hyunmoo-4 នេះ ត្រូវបានធ្វើតេស្តសាកល្បង​ដោយស្ងាត់ៗ ​នៅឯកន្លែង​តេស្ត Anheung ដែលប្រតិបត្តិការដោយទីភ្នាក់ងារកូរ៉េទទួលបន្ទុកលើ​វិស័យអភិវឌ្ឍន៍ និងការពារជាតិ ហៅកាត់ថា ADD។

សូមជម្រាបផងដែរថា យោធាទីក្រុងសេអ៊ូលរបស់ប្រទេសកូរ៉េខាងត្បូង បានចាប់ផ្តើមអភិវឌ្ឍមីស៊ីលផ្លោងធុនធ្ងន់នេះ តាំងពីឆ្នាំ ២០១៧ មកម៉្លេះ។ ហើយបើតាមសេចក្តីរាយការណ៍ មីស៊ីលប្រភេទនេះ អាចហោះបានចម្ងាយ ៨០៤ គីឡូម៉ែត្រ និងអាចកម្ទេចទីតាំងសំខាន់ៗរបស់កូរ៉េខាងជើងបាន៕