ប៉ុន្មានថ្ងៃចុងក្រោយនេះ តាមរយៈបណ្តាញផ្សព្វផ្សាយសង្គម យើងសង្កេតឃើញការកើនឡើងគួរឲ្យកត់សម្គាល់នូវតម្រូវការប្រើប្រាស់សេវាបណ្ណបើកបរយានយន្តយ៉ាងច្រើនសន្ធឹកសន្ធាប់។ ជាការឆ្លើយតប ក្នុងន័យបំពេញសេចក្តីត្រូវការទាំងនោះ ក្រសួងសាធារណការ និងដឹកជញ្ជូន បានបញ្ជាក់ក្នុងទំព័រហ្វេសប៊ុកផ្លូវការរបស់ខ្លួន អំពីទីតាំង ពេលវេលា និងឯកសារដែលអ្នកចង់បានសេវាបណ្ណបើកបរយានយន្តត្រូវយល់ដឹង។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សក្រសួងសាធារណការបញ្ជាក់ថា៖ «រាល់ការប្រឡងយកបណ្ណបើកបរយានយន្ត(ទោចក្រ-ត្រីចក្រយានយន្ត និងរថយន្ត) ត្រូវធ្វើឡើងតាមគ្រប់មន្ទីរសាធារណការ និងដឹកជញ្ជូន ទូទាំង២៥ រាជធានី-ខេត្ត ទាំងការប្រឡងទ្រឹស្តី និងដៃចង្កូត»។
ក្រសួងបានបន្ថែមនៅក្នុងសេចក្តីជូនដំណឹងថា៖
· ទីតាំង៖
- ភ្នំពេញ៖ នៅអង្គភាពផ្តល់បណ្ណបើកបរ របស់មន្ទីរសាធារណការ និងដឹកជញ្ជូនរាជធានីភ្នំពេញ ស្ថិតនៅផ្លូវ៥៩៨ (ផ្លូវឯកឧត្តម ជាសុផារ៉ា) ខណ្ឌឫស្សីកែវ រាជធានីភ្នំពេញ (ចម្ងាយប្រមាណ៧០០ម៉ែត្រ ពីអគ្គនាយកដ្ឋានដឹកជញ្ជូនផ្លូវគោក ទល់មុខបុរីជីបម៉ុង៥៩៨)
- មន្ទីរសាធារណការ និងដឹកជញ្ជូន ទាំង២៤ខេត្ត ផ្សេងទៀត
(ចំណែកឯមណ្ឌលផ្តល់បណ្ណបើកបរយានយន្ត ផ្សារទំនើបអ៊ីអន១ និង២ សម្រាប់តែការផ្តល់សេវាប្តូរ និងពន្យារបណ្ណបើកបរប៉ុណ្ណោះ)
· ពេលវេលាផ្តល់សេវា៖
- ថ្ងៃចន្ទ ដល់ សៅរ៍ ( និងបន្ថែមថ្ងៃអាទិត្យ១ថ្ងៃ នាថ្ងៃទី១០ ឧសភា ២០២០)
- ម៉ោង៨:០០ព្រឹក ដល់ ៥:០០ល្ងាច
· ឯកសារសម្រាប់ការប្រឡងយកបណ្ណបើកបរ៖
*១. អត្តសញ្ញាណប័ណ្ណសញ្ជាតិខ្មែរ
*២. លិខិតបញ្ជាក់កាយសម្បទា(អាចធ្វើនៅទីតាំងផ្ទាល់)
*៣. រូបថត ៤x៦ ផ្ទៃពណ៌ស ៣សន្លឹក(ថតនៅទីតាំងផ្ទាល់)
(*៤. និងលិខិតបញ្ជាក់ការសិក្សាពីសាលាង្រៀនបើកបរ ក្នុងករណីប្រឡងបណ្ណប្រភេទ គ ឃ និង ង។)
· ទ្រឹស្តីនៃការបើកបរ ធ្វើតេស្តសាកល្បង (Cambodia Driving Rules) ៖
- App Store: https://dr.mpwt.gov.kh/ios
- Play Store: https://dr.mpwt.gov.kh/android
ជាការកត់សម្គាល់ ការកើនឡើងនៃការប្រើប្រាស់សេវាបណ្ណបើកបរយានយន្តយ៉ាងច្រើនសន្ធឹកសន្ធាប់ ក្នុងរយៈពេលថ្មីៗនេះ ធ្វើឡើងក្រោយ ស្នងការដ្ឋាននគរបាលរាជធានីភ្នំពេញបានបញ្ជាក់ថា នឹងប្រើប្រាស់កម្លាំងជាង១ពាន់នាក់ ដើម្បីចេញប្រតិបត្តិការអនុវត្តរឹតបន្តឹងស្តីពីច្បាប់ចរាចរណ៍ផ្លូវគោក ដែលគម្រោងនោះបានចាប់ផ្តើមតាំងពីថ្ងៃទី០១ ខែឧសភាមកម្ល៉េះ។ ក្នុងនោះក្រុងភ្នំពេញ ចំនួន ៤៧គោលដៅ អនុវត្តទាំងយប់ទាំងថ្ងៃ សំដៅកាត់បន្ថយអត្រាគ្រោះថ្នាក់ចរាចណ៍។ នេះជាការផ្សាយជាសាធារណៈ ពីសំណាក់អគ្គស្នងការដ្ឋាននគរបាលជាតិនាល្ងាចថ្ងៃ ២៨ មេសា កន្លងទៅ។
បើតាមអាជ្ញាធរ ការអនុវត្តរឹតបន្តឹងច្បាប់ចរាចរណ៍ផ្លូវគោកនេះ អ្នកបើកបរល្មើសច្បាប់ចរាចរណ៍នឹងរងពិន័យទឹកប្រាក់ពី៣ដងដល់ទៅ៥ដងទៅតាមបទល្មើស។ ការផាកពិន័យ គឺមិនធ្វើនៅកន្លែងអនុវត្តនោះឡើយ តែត្រូវបញ្ជូនយានយន្តល្មើសទៅកន្លែងធ្វើការរបស់សមត្ថកិច្ចដែនៅជិតបំផុត និងរក្សាទុក០៣ថ្ងៃសិន ទើបឱ្យម្ចាស់ចូលខ្លួនទៅបង់ប្រាក់ពិន័យតាមច្បាប់។
សូមបញ្ជាក់ថា អាជ្ញាធរបានកំណត់យកបទល្មើសចំនួន៧ចំណុច ក្នុងចំណោម ៣៣ ដែលត្រូវត្រួតពិនិត្យមុនគេសម្រាប់ទោចក្រយានយន្ត ត្រីចក្រយានយន្ត ត្រីចក្រយានយន្តសណ្តោងរ៉ឺម៉ក និងម៉ូតូកង់បួន។ ចំណុចល្មើសទាំងនោះរួមមាន មិនពាក់មួកសុវត្ថិភាព,មិនគោរពភ្លើង និងផ្លាកសញ្ញាចរាចរណ៍, ល្មើសក្នុងការបត់ ការវ៉ាជែង, ការដឹកលើសចំណុះ,ស្រវឹង,គ្មានផ្លាកលេខ និងប្រើទូរស័ព្ទពេលបើកបរដោយគ្មានឧបករណ៍ភ្ជាប់សំឡេង។
ចំណែកបទល្មើសរថយន្តមាន៩ ក្នុងចំណោម៤១ ដែលត្រូវត្រួតពិនិត្យ និងចាប់ផាកពិន័យមុនគេ គឺរួមមានល្មើសល្បឿន, ស្រវឹង, គ្មានបណ្ណបើកបរ, មិនគោរពភ្លើងសញ្ញា និងផ្លាកសញ្ញាចរាចរណ៍, ល្មើសក្នុងការបទ និងវ៉ាជែង, មិនពាក់ខ្សែក្រវាត់សុវត្ថិភាព, ដឹកលើសចំណុះ, គ្មានស្លាកលេខ និងប័ណ្ណសម្គាល់យានយន្ត និងនិយាយទូរស័ព្ទពេលបើកបរដោយគ្មានឧបករណ៍ភ្ជាប់សំឡេង៕