តារា Tik Tok ម្នាក់ត្រូវបានស្នងការរាជធានីភ្នំពេញកោះហៅមកអប់រំ បន្ទាប់ពីបានធ្វើរឿងមួយនេះ

ភ្នំពេញ៖ យោងតាមសេចក្តីបកស្រាយបំភ្លឺរបស់ក្រុមការងារព័ត៌មាន និងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញបានបង្ហាញថា៖

ស្រ្តីម្នាក់ឈ្មោះ គួក ស្រីណា ប្រើប្រាស់គណនី TIKTOK ឈ្មោះ អែ ណា បានយកព័ត៌មានចាស់តាំង ពីឆ្នាំ ២០១៨ ដែលបានបើកបរល្មើសភ្លើងសញ្ញាចរាចរណ៍ យកមកផុសខុសពីការពិតកាលពីព្រឹកថ្ងៃទី០៣ ខែឧសភា ឆ្នាំ២០២០ ធ្វើឲ្យប្រជាពលរដ្ឋ និងមជ្ឈដ្ឋានទូទៅមានការយល់ច្រឡំ ជាពិសេសគាត់បាននិយាយខុសពីការពិត មើលងាយមកលើសមត្ថកិច្វ និងធ្វើឲ្យប៉ះពាល់ធ្ងន់ធ្ងរដល់កិត្តិយសរបស់សមត្ថកិច្ចដែលបានខិតខំបំពេញភារកិច្ចក្នុងការអនុវត្តរឹតបន្តឹងច្បាប់ចរាចរណ៍ផ្លូវគោក។

កញ្ញា គួក ស្រីណា បានចូលខ្លួនមកបំភ្លឺ តាមការកោះហៅរបស់សមត្ថកិច្ចការិយាល័យប្រឆាំងបទ ល្មើសបច្ចេកវិទ្យាផែនការសន្តិសុខនៃស្នងការដ្ឋាននគរបាលរាជធានីភ្នំពេញ ដើម្បីសួរនាំ ហើយគាត់ក៏បានទទួលកំហុសទាំងស្រុង និងបានថតវីដេអូសុំទោសជាសាធារណ:ដល់ប្រជាពលរដ្ឋ ជាពិសេស សុំទោសដល់សមត្ថកិច្ចនៃស្នងការដ្ឋាននគរបាលរាជធានីភ្នំពេញ។

ក្រោយពីសមត្ថកិច្ចបានធ្វើការណែនាំ អប់រំ និងធ្វើកិច្ចសន្យាដោយផ្តិតមេដៃរួចមក សមត្ថកិច្ចក៏បានឲ្យគាត់ត្រឡប់ទៅគេហដ្ឋានវិញ។

គួរបញ្ជាក់ផងដែរថា គួក ស្រីណា ក៏ជាអតីតបេក្ខជនប្រលងចម្រៀងលំដាប់ពិភពលោក Cambodian idol រដូវកាលទី២ ដែលរៀបចំដោយក្រុមហ៊ុនហង្សមាសផងដែរ៕