លោកខៀវ កាញារីទ្ធ រដ្ឋមន្ត្រីក្រសួងព័ត៌មានបានបង្ហើបនៅក្នុងគណនីហ្វេសប៊ុកផ្លូវការរបស់លោកនាយប់ថ្ងៃ ០៣ ឧសភា ២០២០នេះថា ថ្ងៃចន្ទជាថ្ងៃចេញធ្វើការងាររបស់ប្រជាពលរដ្ឋដើម្បីរកស៊ីចិញ្ចឹមជីវិត។ លោកបានអំពាវនាវឲ្យមន្ត្រីចរាចរណ៍ យកចិត្តទុកដាក់លើអ្នកប្រើប្រាស់យានយន្តដែលរំលោភច្បាប់ចរាចរណ៍ធំធេង ហើយប្រាប់ឲ្យសមត្ថកិច្ចបន្ធូរខ្លះផង។ លោកបន្ថែមថា ការអនុវត្តច្បាប់នេះ គឺអនុវត្ត ៣៦៥ ថ្ងៃក្នុង ១ ឆ្នាំ មិនមែនតែ ១ អាទិត្យ ឬ ១ ខែ នេះទេ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សរដ្ឋមន្ត្រីក្រសួងព័ត៌មានរូបនេះថា៖ «ស្អែកថ្ងៃចេញធ្វើការចិញ្ចឹមជីវិត សូមបងប៉ូលីសមើលតែរឿង «រំលោភ»ច្បាប់ចរាចរណ៍ធំធេង ( មិនឈប់ភ្លើងស្តុប ដាក់ហួសទំងន់ពេក មិនពាក់មួកសុវត្ថិភាព បើកហួសល្បឿន បើកបរក្នុងភាពស្រវឹង ) ហើយ បន្ធូរខ្លះសិនផង ។ បំណងល្អទាំងអស់គ្នាទេ ។ ការអនុវត្តច្បាប់នេះ គឺអនុវត្តន៍ ៣៦៥ ថ្ងៃក្នុង ១ ឆ្នាំ មិនមែនតែ ១ អាទិត្យ ឬ ១ ខែ នេះទេ»។
ជាការកត់សម្គាល់ ការលើកឡើងរបស់លោក ខៀវ កាញារីទ្ធ យ៉ាងដូច្នេះ ធ្វើឡើងក្រោយប៉ុន្មានថ្ងៃដែលនគរបាលចរាចរណ៍ប្រើប្រាស់វិធានការបន្តឹងច្បាប់ចរាចរណ៍ផ្លូវគោកនោះ មានមជ្ឈដ្ឋានមួយចំនួនសរសើរ ខណៈមួយចំនួនរិះគន់ថា ការបន្តឹងច្បាច់ចរាចរណ៍នាពេលនេះហាក់គាបសង្កត់ពលរដ្ឋដែលមានជីវភាពខ្វះខាតហួសហេតុ។
គួររំឭកថា កន្លងមកស្នងការដ្ឋាននគរបាលក្រុងភ្នំពេញបានបញ្ជាក់ថា នឹងប្រើប្រាស់កម្លាំងជាង១ពាន់នាក់ ដើម្បីចេញប្រតិបត្តិការអនុវត្តរឹតបន្តឹងស្តីពីច្បាប់ចរាចរណ៍ផ្លូវគោក ដែលគ្រោងនឹងចាប់ ផ្តើមនៅថ្ងៃទី០១ ខែឧសភា ឆ្នាំ២០២០ នៅក្នុងក្រុងភ្នំពេញ ចំនួន ៤៧គោលដៅ អនុវត្តទាំងយប់ទាំងថ្ងៃ សំដៅកាត់បន្ថយអត្រាគ្រោះថ្នាក់ចរាចណ៍។ នេះជាការផ្សាយជាសាធារណៈ ពីសំណាក់អគ្គស្នងការដ្ឋាននគរបាលជាតិនាល្ងាចថ្ងៃ ២៨ មេសា កន្លងទៅ។
បើតាមអាជ្ញាធរ ការអនុវត្តរឹតបន្តឹងច្បាប់ចរាចរណ៍ផ្លូវគោកនេះ អ្នកបើកបរល្មើសច្បាប់ចរាចរណ៍នឹងរងពិន័យទឹកប្រាក់ពី៣ដងដល់ទៅ៥ដងទៅតាមបទល្មើស។ ការផាកពិន័យ គឺមិនធ្វើនៅកន្លែងអនុវត្តនោះឡើយ តែត្រូវបញ្ជូនយានយន្តល្មើសទៅកន្លែងធ្វើការរបស់សមត្ថកិច្ចដែនៅជិតបំផុត និងរក្សាទុក០៣ថ្ងៃសិន ទើបឱ្យម្ចាស់ចូលខ្លួនទៅបង់ប្រាក់ពិន័យតាមច្បាប់៕