ខេត្តពោធិ៍សាត់ ៖ រថយន្តស្ទូចដឹកសំបកធុងសាំងមួយគ្រឿងបានជ្រុលទៅបុកជាមួយរថយន្តដឹកគ្រឿងចក្រ បណ្តាលឱ្យខ្ទេចមុខនិងរបើកដំបូលខ្លួនឯង តែសំណាងល្អ អ្នកបើកបរមិនមានរងរបួស។ គ្រោះថ្នាក់នេះកើតឡើងនៅផ្លូវជាតិលេខ៥ លើស្ពានខាងមុខសាខាពន្ធដារខេត្ត ស្ថិតក្នុងភូមិមាន់ចែ សង្កាត់រលាប ក្រុងពោធិ៍សាត់ កាលពីវេលាម៉ោង១២និង៣០នាទីរំលងអធ្រាត្រឈានចូលថ្ងៃទី២៩ មីនា ។
ប៉ូលិសក្រុងពោធិ៍សាត់ឱ្យដឹងថា រថយន្តទាំងពីរគ្រឿងនេះ ១គ្រឿងម៉ាកនីស្សាន់ពណ៌ស មានដងសន្ទូចដឹកសំបកធុងសាំង បើកបរដោយឈ្មោះ អ៊ុំ ជឿន ភេទប្រុស អាយុ២៧ឆ្នាំ រស់នៅក្នុងភូមិអូរ ឃុំពន្លៃ ស្រុកបរិបូណ៌ ខេត្តកំពង់ឆ្នាំងនិងមួយគ្រឿងទៀតម៉ាកហ្វ៊ុយយហ្សូ ពណ៌ស ដឹកគ្រឿងចក្រចូកដីចំនួន២គ្រឿង បើកបរដោយឈ្មោះ ខេង ខៃ ភេទប្រុស អាយុ២៧ឆ្នាំដែរ រស់នៅភូមិស្វាយមាស ឃុំសំពងជ័យ ស្រុកជើងព្រៃ ខេត្តកំពង់ចាម ។ នៅយប់នោះ អ្នកបើករថយន្តនីស្សាន់ដឹកសំបកធុងសាំង ដែលសង្ស័យស្រវឹងស្រា ធ្វើដំណើរមកពីទិសខាងកើតលុះទៅដល់លើស្ពានក៏រេចង្កូតឆ្លងគំនូសផ្លូវទៅបុករះជញ្ជាំងរថយន្តហ្វុ៊យហ្សូដឹកគ្រឿងចក្រ ដែលកំពុងធ្វើដំណើរបញ្ច្រាសទិសគ្នា បណ្តាលឱ្យរថយន្តនីស្សាន់ខ្ទេចមុខ របើកដំបូលមើលទៅគួរឱ្យរន្ធត់ ប៉ុន្តែមិនមានអ្នករងរបួសទេ ។
ចំណែកអ្នកបើករថយន្តនីស្សាន់ដឹកសំបកធុងសាំងនិយាយថា នៅយប់នោះខ្លួនងងុយដេក ហើយចាំងភ្លើងហ្វារថយន្តមើលមិនឃើញ ទើបបង្កឱ្យមានគ្រោះថ្នាក់បែបនេះ ។ ប៉ុន្តែប៉ូលិសក្រុងពោធិ៍សាត់ដែលធ្វើការនៅទីនោះនិយាយថា អ្នកបើករថយន្តរូបនោះ ពេលចុះពីលើរថយន្តមកគឺធុំក្លិនស្រា ដែលអាចសន្និដ្នានបានថា ស្រវឹងស្រា ។
រថយន្តទាំងពីរគ្រឿងត្រូវបានយកទៅរក្សាទុកនៅអធិការដ្ឋានក្រុងពោធិ៍សាត់ រង់ចាំក្រុមហ៊ុនធានារ៉ាប់រងចូលមកដោះស្រាយតាមនីតិវិធីច្បាប់ ៕
ស្រីណា កោះ
ផ្តល់សិទ្ធដោយ កោះសន្តិភាព
សូមប្រិយមិត្តជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]