ក្នុងអំឡុង នៅដាច់ដោយឡែកពីគេក្នុងពេលកំពុងតែផ្ទុះជំងឺកូវីដ១៩ គ្រប់គ្នាពិតជាព្យាយាមខ្លាំងណាស់ដើម្បីកុំឲ្យជំងឺនេះកាន់តែរាតត្បាតបន្ថែមទៀត។ នៅពេលអ្នកនៅក្នុងផ្ទះជាប់រហូត អ្នកអាចនឹងធ្វើរឿងជាច្រើនដើម្បីមានប្រយោជន៍ក្នុងពេលទំនេរបែបនេះ។ ការថែរក្សាសក់ត្រូវបានគេចាត់ទុកថាជារឿងញឹកញាប់មួយសម្រាប់ស្រ្តីគ្រប់រូបយូរណាស់ហើយ ប៉ុន្តែសព្វថ្ងៃនេះបុរសក៏យកចិត្តទុកដាក់ចំពោះសម្រស់ខ្លួនឯងលើការថែរក្សាសក់ដែរ។ ដូច្នេះបើសិនជាអ្នកកំពុងតែខ្វាយខ្វល់ច្រើនអំពីការជ្រុះសក់ច្រើន និងសក់ដុះមិនបានច្រើន យកល្អគួរតែព្យាយាមអនុវត្តវិធីខាងក្រោមនេះដើម្បីបង្កើនការដុះសក់កាន់តែច្រើនវិញ៖
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សកុំកក់សាប៊ូញឹកញាប់ពេក
បើសិនជាអ្នកកំពុងតែប្រើសាប៊ូកក់សក់រាល់ថ្ងៃ វាប្រហែលជាអាចបណ្តាលឲ្យសក់ខូច និងបែកចុង រហូតដល់ជ្រុះបាន។ សាប៊ូកក់សក់នឹងបំបាត់ជាតិប្រេងចេញពីស្បែកក្បាល និងធ្វើឲ្យសរសៃសក់ចុះខ្សោយ។ ដូច្នេះចូរកាត់បន្ថយការកក់សក់មកត្រឹមពីរទៅបីដងក្នុងមួយសប្តាហ៍អីបានហើយ។ ការប្រើក្រែមបន្ទន់សក់បន្ថែមក៏អាចបង្ការភាពបាត់បង់សំណើម និងខូចខាតរបស់សក់ថែមទៀត។
ចៀសវាងការសិតសក់ច្រើនពេក
វាពិតជារឿងសំខាន់ដែលអ្នកត្រូវសិតសក់ ដោយសារតែវាអាចបង្កើនការលូតលាស់សក់បាន ប៉ុន្តែចូរធ្វើវាដោយថ្នមៗផង។ ការសិតសក់អាចជួយឲ្យប្រេងធម្មជាតិលើស្បែកក្បាលគ្របដណ្តប់ពេញក្បាល និងពង្រឹងដល់លំហូរឈាមដែរ។ ប៉ុន្តែការសិតសក់ច្រើនពេកអាចនាំឲ្យសក់ក្បាលខូចបាន។
ព្យាយាមម៉ាស្សាស្បែកក្បាល
យោងទៅតាមការសិក្សាមួយបានឲ្យដឹងថា ការម៉ាស្សាស្បែកក្បាលប្រហែលជាបង្កើនការលូតលាស់ និងគុណភាពរបស់សក់បាន។ បុរសមានសុខភាពល្អដែលម៉ាស្សាស្បែកក្បាល ៤នាទី រយៈពេល ២៤សប្តាហ៍ ឃើញថាសក់របស់ពួកគេដុះយ៉ាងច្រើន។
របបអាហារមានតុល្យភាព
ចូរប្រាកដថា របបអាហារអ្នកមានជីវជាតិសំខាន់ៗសម្រាប់សុខភាពសក់ដូចជា Biotin, Folic Acid និងវីតាមីន A, C, D និង E។ វីតាមីន E ដើរតួនាទិសំខាន់មួយនៅពេលនិយាយដល់ការលូតលាស់សក់លើបុរស។ ការសិក្សាមួយដែលចុះផ្សាយក្នុងសារព័ត៌មាន Tropical Life Sciences Research បានរកឃើញថា អ្នកចូលរួមសិក្សាដែលបានញ៉ាំវីតាមីន E មានការលូតលាស់សក់យ៉ាងល្អ។ ដូច្នេះហើយ ចូរញ៉ាំអាហារជាច្រើនដូចជា ផ្លែអាលម៉ុន គ្រាប់ផ្កាឈូករ័ត្ន និងផ្សេងៗទៀត។
ចៀសវាងការងូតទឹកក្តៅ
ការងូតទឹកក្តៅអាចធ្វើឲ្យមានអារម្មណ៍ធូរស្រាលមែន ប៉ុន្តែជាអកុសល វាមិនល្អសម្រាប់សក់ឡើយ។ ការលាងសម្អាតសរសៃសក់ដោយប្រើទឹកក្តៅអាចបំផ្លាញប្រេងធម្មជាតិរបស់ស្បែកក្បាល ដែលជាហេតុធ្វើឲ្យសក់ងាយខូច និងចុះខ្សោយ។ តែអ្នកអាចសាកល្បងប្រើប្រាស់ទឹកក្តៅឧណ្ហៗដើម្បីលាងសម្អាតសក់បាន៕