ស្នងការដ្ឋាននគរបាលក្រុងភ្នំពេញ នឹងប្រើប្រាស់កម្លាំងជាង១ពាន់នាក់ ដើម្បីចេញប្រតិបត្តិការអនុវត្តរឹតបន្តឹងស្តីពីច្បាប់ចរាចរណ៍ផ្លូវគោក ដែលគ្រោងនឹងចាប់ ផ្តើមនៅថ្ងៃទី០១ ខែឧសភា ឆ្នាំ២០២០ នៅក្នុងក្រុងភ្នំពេញ ចំនួន ៤៧គោលដៅ អនុវត្តទាំងយប់ទាំងថ្ងៃ សំដៅកាត់បន្ថយអត្រាគ្រោះថ្នាក់ចរាចណ៍។ នេះជាការផ្សាយជាសាធារណៈ ពីសំណាក់អគ្គស្នងការដ្ឋាននគរបាលជាតិនាល្ងាចថ្ងៃ ២៨ មេសា ម្សិលមិញ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សនៅក្នុងទំព័រហ្វេសប៊ុកផ្លូវការរបស់ខ្លួន មន្ត្រីអគ្គស្នងការបានបន្ថែមថា៖ «នៅក្នុងរាជធានីភ្នំពេញត្រូវគេមើលឃើញថា អត្រាគ្រោះថ្នាក់ចរាចរណ៍នៅតែកើតឡើងជាបន្តបន្ទាប់បណ្តាលឱ្យបាត់បង់ជីវិតមនុស្សជារៀងរាល់ថ្ងៃ។ ក្នុងកិច្ចការងារដើម្បីអនុវត្តច្បាប់ចរាចរណ៍ផ្លូវគោកឱ្យមានប្រសិទ្ធភាព ស្នងការដ្ឋាននគរបាលក្រុងភ្នំពេញបានបើកកិច្ចប្រជុំផ្សព្វផ្សាយស្តីពីការផាកពិន័យអន្តរការណ៍ ចំពោះអំពើល្មើសច្បាប់ចរាចរណ៍ផ្លូវគោក ជូនដល់នគរបាលចរាចររាជធានីភ្នំពេញ ដែលជាអ្នកអនុវត្តច្បាប់ ដើម្បីចុះអនុវត្ត ភារកិច្ចឱ្យបានត្រឹមត្រូវ ម៉ឺងម៉ាត់ មានតម្លាភាព ប្រសិទ្ធភាព និងគ្មានការយោគយល់»។
ពាក់ព័ន្ធនឹងការចុះអនុវត្តច្បាប់ចរាចរណ៍ផ្លូវគោក នៅក្នុងរាជធានីភ្នំពេញនៅពេលខាងមុខនេះផងដែរ អាជ្ញាធរបញ្ជាក់ថា ខ្លួននឹងអនុវត្តច្បាប់ចរាចរណ៍ផ្លូវគោក ឱ្យបានម៉ឺងម៉ាត់ ដោយអះអាងថា បញ្ហាអត្រាគ្រោះថ្នាក់ចរាចរណ៍ មានសភាពធ្ងន់ធ្ងរណាស់ គ្រាន់តែនៅក្នុងខែមេសាយៈពេល២៧ថ្ងៃប៉ុណ្ណោះនៅក្នុងរាជធានីភ្នំពេញ បណ្តាលឱ្យមនុស្សស្លាប់១៩នាក់ទៅហើយ។
សូមបញ្ជាក់ថា ការអនុវត្តរឹតបន្តឹងច្បាប់ចរាចរណ៍ផ្លូវគោកនេះ អ្នកបើកបរល្មើសច្បាប់ចរាចរណ៍នឹងរងពិន័យទឹកប្រាក់ពី៣ដងដល់ទៅ៥ដងទៅតាមបទល្មើស។ ការផាកពិន័យ គឺមិនធ្វើនៅកន្លែងអនុវត្តនោះឡើយ តែត្រូវបញ្ជូនយានយន្តល្មើសទៅកន្លែងធ្វើការរបស់សមត្ថកិច្ចដែនៅជិតបំផុត និងរក្សាទុក០៣ថ្ងៃសិន ទើបឱ្យម្ចាស់ចូលខ្លួនទៅបង់ប្រាក់ពិន័យតាមច្បាប់៕