អង្គការសុខភាពពិភពលោកបានលើកឡើងកាលពីថ្ងៃសៅរ៍ថា បច្ចុប្បន្នមិនទាន់មានភស្ដុតាងណាមួយបង្ហាញថា អ្នកជំងឺដែលបានជាសះស្បើយពីជំងឺកូវីដ១៩ ហើយមានអង្គបដិបក្ខ (antibodies) អាចការពារពួកគេពីការឆ្លង លើកទីពីរនៅឡើយ។នៅក្នុងសេចក្តីសង្ខេបបែបវិទ្យាសាស្ត្រមួយ ទីភ្នាក់ងាររបស់អង្គការសហប្រជាជាតិបានព្រមានដល់រដ្ឋាភិបាលទាំងអស់ ក្នុងការចេញលិខិតឆ្លងដែនបញ្ជាក់ពីភាពស៊ាំ ឬលិខិតបញ្ជាក់ថាមិនមានហានិភ័យ ដល់អ្នកដែលបានឆ្លងជំងឺម្ដងរួចហើយជាសះស្បើយ ដោយសារមិនអាចធានាពីការមិនឆ្លងម្តងទៀតនោះឡើយ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សការធ្វើបែបនេះ គឺអាចនឹងបង្កគ្រោះថ្នាក់ក្នុងការឆ្លងខ្ពស់ជាងមុនទៅទៀត ព្រោះអ្នកដែលបានឆ្លងម្ដងរួចហើយនោះពួកគេ នឹងលែងគោរពតាមការណែនាំរបស់រដ្ឋាភិបាល ឬវិធានការការពាររបស់គ្រូពេទ្យទៀតហើយ។
WHOបានលើកឡើងថា៖ "មានរដ្ឋាភិបាលនៃប្រទេសមួយចំនួនបានអះអាងថាការធ្វើតេស្តរកអង្គបដិបក្ខ (antibodies) របស់វីរុសSARS-CoV-2 ដែលជាអ្នកបង្កជំងឺCOVID-19នេះ នឹងអាចជួយអោយពួកគេផ្ដល់លិខិតឆ្លងដែនបញ្ជាក់ពីភាពស៊ាំ ឬលិខិតបញ្ជាក់ថាមិនមានហានិភ័យដល់ប្រជាជនណាដែលបានឆ្លងរួចហើយ អោយត្រលប់ទៅធ្វើការវិញបាន និងអាចធ្វើដំណើរឆ្លងប្រទេសបានធម្មតាវិញ ដោយសារពួកគេនឹងមិនអាចឆ្លងជំងឺនេះម្ដងទៀតបានទេ។"
ប្រទេសឈីលី បានបញ្ជាក់កាលពីសប្ដាហ៍មុនថាពួកគេចាប់ផ្ដើមផ្ដល់លិខិតឆ្លងដែនសុខភាព “health passports” ដល់ប្រជាជនពួកគេដែលបានជាសះស្បើយពីជំងឺនេះ។ នៅពេលដែលពួកគេឆ្លងកាត់ការត្រួតពិនិត្យដែលបញ្ជាក់ថាពួកគេមានអង្គបដិបក្ខ(antibodies) នៅក្នុងខ្លួនដែលអាចស៊ាំទៅនឹងវីរុសបានហើយ ពេលនោះពួកគេនឹងអាចត្រលប់ទៅធ្វើការបានវិញភ្លាម។
អង្គការសុខភាពពិភពលោក បាននិយាយថាខ្លួនបានបន្តពិនិត្យមើលភស្តុតាងស្តីពីការឆ្លើយតបនៃអង្គបដិបក្ខទៅ នឹងវីរុសដែលបានកើតឡើងនៅក្នុងទីក្រុង Wuhan ភាគកណ្តាលប្រទេសចិនកាលពីចុងឆ្នាំមុនមួយនេះ។
WHO បានបន្តទៀតថា ការសិក្សាជាច្រើនបានបង្ហាញថា៖ "អ្នកដែលបានជាសះស្បើយពីការជំងឺនេះជាធម្មតានឹងមានអង្គបដិបក្ខ(antibodies)នៅក្នុងខ្លួនដែលអាចស៊ាំទៅនឹងវីរុសនេះ តែពួកគេមួយចំនួនមានអង្គបដិបក្ខ(antibodies)នៅក្នុងឈាមជាប្រភេទខ្សោយដែលធ្វើអោយប្រព័ន្ធកោសិកាភាពស៊ាំពិបាកក្នុងការបន្សាំ។"
គួរបញ្ជាក់ផងដែរថា មកដល់ថ្ងៃនេះមនុស្សប្រមាណ ២,៨ លាននាក់ត្រូវបានគេរាយការណ៍ថាបានឆ្លងវីរុសនេះនៅទូទាំងពិភពលោកហើយប្រមាណ២សែនបានបាត់បង់ជីវិត៕