តូក្យូ៖ រដ្ឋាភិបាលជប៉ុនបានបង្ហាញការប៉ាន់ប្រមាណកាលពីថ្ងៃអង្គារកន្លងទៅថា ភាគខាងជើងប្រទេសជប៉ុនអាចនឹងទទួលរងគ្រោះដោយរលកស៊ូណាមី ដែលមានកម្ពស់ជិត ៣០ ម៉ែត្រ ប្រសិនបើមានការរញ្ជួយដីចាប់ពីកម្រិត ៩ រ៉ិចទ័រ កើតឡើងនៅក្បែរអន្លង់ទឹកជ្រៅ នៃឆ្នេរសមុទ្រប៉ាស៊ីហ្វិករបស់ខ្លួន។ នេះបើយោងតាមការផ្សាយរបស់ទីភ្នាក់ងារសារព័ត៌មាន Nippon។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សការប៉ាន់ប្រមាណដែលធ្វើឡើងដោយក្រុមអ្នកជំនាញ មកពីការិយាល័យគណៈរដ្ឋមន្រ្តី បានចែកការវាយតម្លៃកម្រិតអាំងតង់ស៊ីតេរញ្ជួយ និងកម្ពស់រលកស៊ូណាមី ក្នុងករណីដែលរលកនេះកើតឡើងនៅក្នុងតំបន់មួយ រួមមាន អន្លង់សមុទ្រ Japan Trench និងអន្លង់សមុទ្រ Kuril Trench ដែលទីតាំងនេះស្ថិតនៅជិតតំបន់ធ្លាប់មានរញ្ជួយដីដ៏ធំមួយ កាលពីខែមីនា ឆ្នាំ២០១១កន្លងទៅ។
ក្រុមអ្នកជំនាញបានធ្វើការសិក្សាលើសមាសធាតុនៃដីល្បាប់ ដែលនាំយកមកដោយរលកស៊ូណាមី ក្នុងរយៈពេល ៦,០០០ឆ្នាំចុងក្រោយនេះ នៅឯឆ្នេរសមុទ្រ Hokkaido ភាគខាងជើងប្រទេសជប៉ុន រហូតទៅដល់អាណាខេត្ត Iwate ភាគឦសាន។
លើសពីនេះ ក្រុមអ្នកជំនាញ បានធ្វើការវិភាគចំនួន ២ សម្រាប់ការរញ្ជួយអតិបរមាដែលអាចកើតឡើង។ ទី១ គឺរញ្ជួយដីកម្រិត ៩.១ រ៉ិចទ័រនៅអន្លង់សមុទ្រ Japan Trench នៅក្បែរឆ្នេរ Sanriku នៃអាណាខេត្ត Iwate ទៅឆ្នេរ Hidaka ក្នុងកោះ Hokkaido ចំណែកទី២ គឺរញ្ជួយដីកម្រិត ៩.៣ រ៉ិចទ័រ នៅអន្លង់សមុទ្រ Kuril Trench នៅជិតឆ្នេរ Tokachi ដល់ Nemuro នៃ Hokkaido ។ ហើយជាចុងក្រោយ ក្រុមអ្នកជំនាញព្យាករណ៍ថា រញ្ជួយដីទាំង ២ នេះ អាចនឹងធ្វើឱ្យកក្រើកនៅតំបន់ធំៗនៃមហាសមុទ្រប៉ាស៊ីហ្វិក គឺចាប់ពីកោះ Hokkaido ទៅដល់អាណាខេត្ត Iwate៕