ប្រាប់ Khmerload នាព្រឹកថ្ងៃ ២៣ មេសានេះ លោកឧកញ៉ាឃ្នួរ ម៉ាត់ សា មេដឹកនាំសហគមន៍ឥស្លាមក្រុមកនអ៊ីម៉ាំសាន់ បានចេញសេចក្តីណែនាំដល់លោកអ៊ីម៉ាំគ្រប់លំដាប់ថ្នាក់ និងបងប្អូនសាសនិកទាំងអស់ឲ្យដឹងអំពីការចូលបួសហ្គាម៉ឺវ៉ាន (រ៉ាម៉ាដាន់)។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សលោកបន្ថែមថា ការចេញសេចក្តីណែនាំបែបនេះគឺ ដោយសារមើលឃើញថា ករណីជំងឺកូវីដ ១៩ នៅតែជាបញ្ហាប្រឈម អាចបង្កហានិភ័យខ្ពស់ដល់សុខភាពសាធារណជន និងអាយុជីវិតមនុស្សទូទាំងពិភពលោក។
លោកថា ហេតុនេះ ដើម្បីជាការឆ្លើយតបក្នុងកិច្ចខំប្រឹងប្រែងរបស់រាជរដ្ឋាភិបាលក្នុងការប្រយុទ្ធប្រឆាំងជំងឺដ៏កាចសាហាវនេះ ដែលស្របពេលការក្នុងការត្រៀមចូលបួសហ្គាម៉ឺវ៉ាន (បួសមានរយៈពេល៣០ថ្ងៃ) កាលពីថ្ងៃទី ២០ ខែមេសា ឆ្នាំ ២០២០ លោកបានសង្កត់ច្បាស់ៗពីចំណុចដូចខាងក្រោម។
សូមលោកអ៊ីមាំគ្រប់លំដាប់ថ្នាក់ និងបងប្អូនសាសនិកឥស្លាមអនុវត្តដូចជា៖
១. សូមថ្នាក់ដឹកនាំវិហារ និងសាសនិកឥស្លាមមើលខ្នើតនៅល្ងាចថ្ងៃព្រហស្បតិ៍ ទី ២៣ ខែមេសា ប្រសិនបើមើលខ្នើតព្រះខែមិនឃើញនោះទេ យើងនឹងចូលបួសនៅល្ងាចថ្ងៃសុក្រ ទី២៤ ខែមេសា ឆ្នាំ ២០២០ ជាកំណត់។
២. ពីឡាល់ត្រូវទូងស្គរប្រាប់ដល់សាសនិកទាំងអស់ឲ្យបានដឹងថា យើងចូលបួសហ្គាម៉ឺវ៉ាន (បួសរយៈពេល ៣០ថ្ងៃ)។
៣. ថ្ងៃដំបូងនៃការចូលបួសហ្គាម៉ឺវ៉ាន សូមបងប្អូនរៀបចំរណ្តាប់ ដូចដែលយើងបានរៀបចំកាលពីឆ្នាំមុនៗ។
៤. ការថ្វាយបង្គំប្រមូលផ្តុំនៅវិហារ សូមផ្អាកជាបណ្តោះអាសន្ន លុះត្រាតែមានសេក្តីណែនាំពី រដ្ឋាភិបាល ទើបយើងអាចប្រតិបត្តិវិញបានធម្មតា តែបងប្អូនអាចថ្វាយបង្គំនៅតាមផ្ទះរៀងៗខ្លួនបាន។
៥. យើងបួសទាំងប្រុសទាំងស្រី (បួសតមអាហានៅពេលថ្ងៃ ស្រាយបួសនៅម៉ោង ៦:២០នាទីល្ងាច) ហើយអូងសៀក (ឆ្នាំវិហារ) ទូងស្គរនៅម៉ោង ៦:២០នាទីល្ងាច រៀងរាល់ថ្ងៃ ជាសញ្ញាប្រាប់នូវពេលស្រាយបួស។
៦. សូមផ្អាកទូលនំចំណី ផ្លែឈើ ទៅវិហារជាបណ្តោះអាសន្នក្នុងខែបួស នាឆ្នាំនេះ។
៧. សាសនិកឥស្លាមជាកាតព្វកិច្ចក្នុងមួយឆ្នាំម្តងត្រូវប៉ាត្រាស់ (បរិច្ចាគ) គ្រប់ៗគ្នា ហើយចាប់ផ្តើមប៉ាត្រាស់នៅថ្ងៃទី ២៧ ខែហ្គាម៉ឺវ៉ាន។ ចំណែកឯថ្ងៃសៅរ៍ ទី ២៣ ខែឧសភា យើងមើលព្រះខែ បើឃើញខ្នើតព្រះខែ ស្រាយបួសថ្ងៃអាទិត្យ តែបើមិនឃើញទេ យើងនឹងស្រាយបួសថ្ងៃចន្ទ ទី២៥ ខែឧសភា ឆ្នាំ២០២០។
៨. យើងរៀបចំម្ហូបអាហារ ផ្លែឈើ នំចំណី នៅថ្ងៃរ៉យ៉ា (ស្រាយបួស) ប៉ុន្តែពិសានៅតាមផ្ទះរៀងៗខ្លួន។
៩. សូមលោកអ៊ីមាំគ្រប់លំដាប់ថ្នាក់ជួយផ្សព្វផ្សាយដល់សាសនិកឥស្លាមទាំងអស់ឲ្យចេះរក្សាអនាម័យ ដោយសម្អាតខ្លួនប្រាណ ហូបនំចំណី អាហារឆ្អិនល្អ រួមទាំងសម្លៀកបំពាក់ប្រើប្រាស់ ហើយត្រូវលាងដៃឲ្យបានញឹកញាប់ជាមួយសាប៊ូ ទឹកស្អាត ឬទឹកអាល់កុលលាងដៃ ត្រូវពាក់ម៉ាស់ ហើយចៀសវាងការចាប់ដៃ។
ជាការកត់សម្គាល់ មេដឹកនាំសហគមន៍ឥស្លាមក្រុមកនអ៊ីមាំសាន់ លោកឧកញ៉ាឃ្នួរ ម៉ាត់ សា បានអំពាវនាវឲ្យលោកអ៊ីមាំ ថ្នាក់ដឹកនាំវិហារ សូរ៉ាវ និងសាសនិកឥស្លាមទូទាំងប្រទេសបង្កើនការយកចិត្តទុកដាក់ ក៏ដូចជាចូលរួមផ្សព្វផ្សាយ អប់រំ ណែនាំ ដើម្បីចូលរួមទប់ស្កាត់ និងបង្ការជំងឺដ៏កាចសាហាវនេះ៕
សូមអានលិខិតលម្អិតខាងក្រោម៖