ទៀតហើយ! ប្រជាជន​បេឡារុស្ស​ប្រមូលផ្តុំគ្នានៅព្រះ​វិហារ​ប្រារព្ធ​ពិធីបុណ្យ​សាសនាមួយ

បេឡារុស្ស៖ ប្រជាជនរាប់ពាន់នាក់បានជួបជុំគ្នានៅតាមព្រះវិហារទូទាំងប្រទេសកាលពីថ្ងៃអាទិត្យនេះ ដើម្បីអបអរបុណ្យអ៊ីស្ទើរ៍ដោយមិនអើពើនឹងការអំពាវនាវពីអាជ្ញាធរសុខាភិបាល និងថ្នាក់ដឹកនាំព្រះ វិហារឲ្យស្នាក់នៅក្នុងផ្ទះដើម្បីការពារការរីករាលដាលនៃជំងឺកូវីដ១៩។

អាចារ្យទាំងអស់បានគ្រោងនឹងធ្វើពិធីនេះនៅក្នុងព្រះវិហារដោយគ្មានអ្នកចូលរួមនៅក្នុងសប្តាហ៍នៃពិធីបុណ្យអ៊ីស្ទើរដែលសង្កេតឃើញដោយគ្រិស្តអូស្សូដក់នៅតាមបណ្តាប្រទេសអឺរ៉ុបខាងកើតជាច្រើន។  

លោក Sergey ដែលបាននាំយកស្បៀងអាហារសម្រាប់ពិធីសូត្រមន្តប្រោះព្រំនៅវិហារ Minsk បានថ្លែងថា៖ “ប្រពៃណីនេះមានតាំងពីជំនាន់ឪពុកម្តាយ និងជីដូនជីតារបស់យើងមក ដូច្នេះវាគួរតែត្រូវថែរក្សាឲ្យបានល្អ។ ខ្ញុំគិតថាយើងមិនបានខាតបង់អ្វីទេដែលមកចូលរួមពិធីក្នុងថ្ងៃនេះនៅពេលយើងមកដល់ថ្ងៃនេះ ខ្ញុំជឿថាព្រះនឹងការពារយើង។" 

ប្រទេសបេឡារុស្សគឺជាប្រទេសមួយក្នុងចំណោមប្រទេសមួយចំនួនតូចដែលមិនបានដាក់ចេញនូវវិធានការរឹតបន្តឹងការធ្វើដំណើរ ឬបិទព្រំដែនដើម្បីទប់ស្កាត់ការរីករាលដាលនៃជំងឺកូវីដ១៩។ ប្រព័ន្ធផ្សព្វផ្សាយរដ្ឋមួយបានសើចចំអកដោយមានការភ័យខ្លាចចំពោះវីរុសថ្មីនេះចំពោះទង្វើរបស់ប្រធានាធិបតីនៃប្រទេសនេះដែលហៅអ្នកដែលមានការភ័យខ្លាចជំងឺនេះថា “មានជំងឺវិកលចរិត”។

លោកប្រធានាធិបតី Alexander Lukashenko បាននិយាយកាលពីថ្ងៃអាទិត្យថា យុទ្ធសាស្ត្ររបស់អាជ្ញាធរដែលបានធ្វើកន្លងមកនេះ គឺត្រឹមត្រូវហើយ។ លោកបានមានប្រសាសន៍ថា “អ្នកដឹងពីជំហររបស់ខ្ញុំហើយថា៖ យើងអាចយកឈ្នះមេរោគទាំងអស់ជារៀងរាល់ឆ្នាំ”។

គួរបញ្ជាក់ផងដែរថា ក្រសួងសុខាភិបាលបេឡារុស្សកាលពីថ្ងៃអាទិត្យនេះបានលើកឡើងថា៖ រហូតមកដល់ពេលនេះមានមនុស្សចំនួន ៤៧នាក់បានស្លាប់ដោយសារវីរុសនេះ ​ដោយគិតត្រឹមថ្ងៃសុក្រនេះចំនួនអ្នកឆ្លងសរុបមាន ៤៧៧៩ករណី។

អ៊ុយក្រែនដែលជាប្រទេសជិតខាងខ្លួន បានហាមឃាត់ប្រជាជនទូទៅពីការជួបជុំបែបសាសនានៅតាមព្រះវិហារ ដោយអនុញ្ញាតឲ្យមនុស្សប្រមូលផ្ដុំគ្នាច្រើនបំផុតបានត្រឹមតែ ១០នាក់ប៉ុណ្ណោះនៅពេលទៅព្រះវិហារម្ដងៗ។ រដ្ឋាភិបាលក៏បានជំរុញម្តងហើយម្តងទៀតឱ្យប្រជាជនស្នាក់នៅផ្ទះឲ្យបានច្រើន៕