«គិតត្រឹមម៉ោង ៨:៣០នាទីព្រឹកថ្ងៃទី១៤ ខែមេសានេះ រោងចក្រនៅទូទាំងប្រទេសបានបន្តបើកដំណើរការធម្មតាតាមបទបញ្ជា និងសំណូមពររបស់រាជរដ្ឋាភិបាល។ កម្មកររោងចក្រជាង 95% ក៏បានមកធ្វើការធម្មតា។» នេះជាការបញ្ជាក់ពីលោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ ប្រាប់សារព័ត៌មានអង្គភាពអ្នកនាំពាក្យ តាមតេលេក្រាម នាព្រឹកថ្ងៃ១៤ មេសានេះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សការបញ្ជាក់របស់លោកហេង សួរ យ៉ាងដូច្នេះធ្វើឡើងក្រោយរដ្ឋាភិបាលបានប្រកាសលើកពេលថ្ងៃឈប់សម្រាក ក្នុងឱកាសបុណ្យចូលឆ្នាំថ្មីប្រពៃណីជាតិទៅពេលក្រោយ ដោយអះអាងថាធ្វើឡើងដើម្បីទប់ស្កាត់ការឆ្លងរីករាលដាលនៃCovid-19។
ជាការកត់សម្គាល់ ក្រសួងសុខាភិបាលកម្ពុជា បានប្រកាសនៅថ្ងៃទី១៤ មេសានេះថា មានអ្នកសះស្បើយ១៤នាក់ បន្ថែមទៀត ដែលធ្វើតួលេខសះស្បើយសរុបកើនដល់៩១នាក់។ នៅថ្ងៃនេះ ក្រសួងអះអាងថាគ្មាន ករណីថ្មីនៃ កូវីដ-១៩ ត្រូវបានរកឃើញនោះទេ ហើយសរុបអ្នកឆ្លងនៅកម្ពុជាមានចំនួន១២២នាក់។
សូមបញ្ជាក់ថា រដ្ឋាភិបាលកាលពីថ្ងៃ០៧ មេសាកន្លងទៅ បានប្រកាសពីការផ្អាកពិធីចូលឆ្នាំថ្មីប្រពៃណីខ្មែរ សម្រាប់ឆ្នាំ២០២០។ ប្រមុខរដ្ឋាភិបាល លើកហេតុផលថា ការផ្អាកនេះ ដោយសារតែការពារកុំឲ្យរាលដាលជំងឺកូវីដ-១៩ក្នុងអំឡុងចូលឆ្នាំខ្មែរ។ ទន្ទឹមនឹងនេះ ប្រមុខរដ្ឋាភិបាលអំពាវនាវឲ្យប្រជាជន កាត់បន្ថយការធ្វើដំណើរទៅស្រុកកំណើត ដែលជាមធ្យោបាយមួយ អាចកាត់បន្ថយការឆ្លងជំងឺកូវីដ-១៩។
សម្តេចនាយករដ្ឋមន្រ្តី ហ៊ុន សែន ប្រកាសថា ស្ថាប័នរដ្ឋ និងស្ថាប័នឯកជន នៅធ្វើការធម្មតា ពោលគឺមិនអនុញ្ញាតឲ្យសម្រាកក្នុងអំឡុងចូលឆ្នាំនេះឡើយ។ ហើយសម្តេចនាយករដ្ឋមន្ត្រីអះអាងថា នៅពេលណាស្ថានភាពជំងឺកូវីដ-១៩ ធូរស្បើយ រដ្ឋាភិបាល នឹងសងថ្ងៃសម្រាក៥ថ្ងៃវិញ ទៅឲ្យអ្នកបម្រើការងារទាំងនៅក្នុងស្ថាប័នរដ្ឋ និងក្រុមហ៊ុនឯកជន៕
Bong I.T