អង់គ្លេស៖ លោកតាមានអាយុ ១០១ឆ្នាំម្នាក់ បានក្លាយជាមនុស្សវ័យចាស់ជាងគេបំផុតក្នុងប្រទេសអង់គ្លេស ដែលជាសះស្បើយពីជំងឺកូវីដ-១៩ វិញ បន្ទាប់ពីប្រយុទ្ធប្រឆាំងជាមួយជំងឺដ៏កាចសាហាវនេះនៅឯមន្ទីរពេទ្យអស់រយៈពេល ២ សប្ដាហ៍។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សលោកតាវ័យចំណាស់ខាងលើមានឈ្មោះថា Keith Watson បានធ្វើតេស្ដរកឃើញមេរោគ និងចូលព្យាបាលក្នុងមន្ទីរពេទ្យ Alexandra នៅឯទីប្រជុំជន Redditch តាំងពី ២ សប្ដាហ៍មុនមកម៉្លេះ ហើយនៅព្រឹកថ្ងៃទី០៩ ខែមេសា ម្សិលមិញនេះ គាត់ត្រូវបានគេអនុញ្ញាតឲ្យចាកចេញពីមន្ទីរពេទ្យហើយ ក្រោយជាសះស្បើយពីជំងឺ។ ហើយនៅមុនពេលចាកចេញនេះ ខាងមន្ទីរពេទ្យក៏បានថតរូបលោកតាកំពុងអង្គុយលើរទេះរុញ ជាមួយនឹងបុគ្គលិកពេទ្យពោរពេញទៅដោយស្នាមញញឹម រួចយកទៅបង្ហោះនៅលើគណនីហ្វេសប៊ុកដោយសរសេរថា« គាត់ត្រលប់ទៅផ្ទះវិញថ្ងៃនេះ បន្ទាប់ពីការព្យាបាលយ៉ាងយកចិត្ដទុកដាក់ពីសំណាក់បុគ្គលិកក្នុងមន្ទីរពេទ្យ Alexandra រយៈពេលពីរសប្ដាហ៍មកនេះ »។
លើសពីនេះទៀត ចៅប្រុសរបស់លោកតា Keith ឈ្មោះ Benjamin Watson ក៏បានចែករំលែករូបភាពនេះបន្ដទៅកាន់បណ្ដាញសង្គមផ្ទាល់ខ្លួនរបស់គេដោយសរសេរថា« លោកតាវ័យ ១០១ឆ្នាំដ៏អស្ចារ្យរបស់ខ្ញុំ បានឆ្លងវីរុសកូរ៉ូណា ប៉ុន្ដែអាចយកឈ្នះវាបាន ខ្ញុំសូមអរគុណអ្នករាល់គ្នានៅ NHS»៕
គួរឲ្យដឹងដែរថា អ្នកឆ្លងជំងឺប្រមាណ ២៧% នៅអង់គ្លេសសុទ្ធសឹងជាក្រុមមនុស្សមានវ័យចំណាស់ ពោលគឺអ្នកមានអាយុលើសពី ៨០ឆ្នាំតែម្ដង ហើយមនុស្សវ័យនេះពិតជាត្រូវការការព្យាបាលនៅមន្ទីរពេទ្យណាស់៕