អេស្ប៉ាញ៖ យោងតាមសេចក្ដីរាយការណ៍បានឲ្យដឹងថា អ្នកចាត់ការទូទៅក្លិប Real Madrid លោក Zinedine Zidane បានចាត់ទុកខ្សែបម្រើវ័យក្មេងក្រុម Rennes កីឡាករ Eduardo Camavinga ជាគោលដៅបន្ទាប់របស់លោក ប្រសិនបើបរាជ័យក្នុងការតាមទិញកីឡាករ Paul Pogba របស់ក្រុមបិសាចក្រហម Manchester United។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សCamavinga វ័យ១៧ឆ្នាំ ត្រូវបានក្លិប Rennes ដំឡើងឲ្យមកលេងក្នុងក្រុមឈុតធំកាលពីឆ្នាំមុន ខណៈរដូវកាលនេះ គេបង្ហាញខ្លួនឲ្យក្រុមនៅក្របខណ្ឌ Ligue 1 បាន៣៦ប្រកួត គិតរាល់ព្រឹត្តិការណ៍ទាំងអស់។
Camavinga ត្រូវបានគេមើលឃើញថា ជាខ្សែបម្រើកំពុងឡើងកូដម្នាក់។ ជាក់ស្ដែងគេទើបត្រូវបានកោះហៅឲ្យចូលក្រុមជម្រើសជាតិបារាំងអាយុក្រោម២១ឆ្នាំ កាលពីខែសីហា ឆ្នាំ២០១៩កន្លងទៅ។
យ៉ាងណាមិញ ទម្រង់លេងរបស់ម្ចាស់អាវលេខ១៨ក្រុម Rennes រូបនេះ បានទាក់ភ្នែកលោក Zidane ហើយបើយោងតាមការចុះផ្សាយរបស់កាសែត AS គ្រូបង្វឹកសញ្ជាតិបារាំងនឹងបង្វែរទិសដៅតាមទិញរូបគេ ប្រសិនបើផ្ទេរយក ខ្សែបម្រើ Paul Pogba មកកាន់ Real Madrid មិនបានសម្រេច។
គួរឲ្យដឹងដែរថា តាមរយៈរបាយការណ៍របស់កាសែត Mundo Deportivo នេះមិនមែនជាលើកទី១ទេ ដែល Real Madrid មានព័ត៌មានលេចឮក្នុងការផ្លាស់ កីឡាករ Camavinga។ ដោយឡែកប្រភពដដែលបានបន្ថែមទៀតថា ខ្សែបម្រើវ័យ១៧ឆ្នាំ មានតម្លៃខ្លួនខ្ទង់៦០លានអឺរ៉ូ៕
ប្រភព៖ caughtoffside