អ៊ុយក្រែន៖ បច្ចុប្បន្ននេះ អ៊ុយក្រែនគឺជាប្រទេសមួយក្នុងចំណោមប្រទេសជាច្រើនទៀតនៅតំបន់អឺរ៉ុប ដែលរងគ្រោះដោយសារវីរុសកូរ៉ូណា ហើយមូលហេតុនេះបានជំរុញឲ្យថ្នាក់ដឹកនាំគ្រប់កម្រិតរួមមានអភិបាលក្រុងជាដើម បានចាត់វិធានការទប់ស្កាត់ និងណែនាំប្រជាពលរដ្ឋក្នុងតំបន់របស់ខ្លួនឲ្យយល់ដឹងពីរបៀបការពារតាមដែលអាចធ្វើទៅបាន។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សតួយ៉ាង អភិបាលក្រុង Dnipro គឺលោក Borys Filatov ដែលគ្រប់គ្រងប្រជាជនក្នុងក្រុងជិត ១លាននាក់ បានបញ្ជាឲ្យអាជ្ញាធររៀបចំជីកផ្នូរថ្មីជាង ៦០០កន្លែង និងត្រៀមថង់ប្លាស្ទិកកម្រាស់ក្រាស់ជាច្រើន សម្រាប់ដាក់សាកសពដែលរំពឹងថានឹងស្លាប់ដោយសារជំងឺកូវីដ-១៩ នាពេលខាងមុខ ដែលបច្ចុប្បន្នទីក្រុងនេះមានអ្នកផ្ទុកវីរុស ជាងដប់នាក់ប៉ុណ្ណោះ។ ហើយវិធានការដ៏ក្ដៅគគុកមួយនេះ គឺធ្វើយ៉ាងណាដើម្បីឲ្យប្រជាជនយល់ដឹងពីគ្រោះថ្នាក់ ប្រសិនបើពួកគេមិនគោរពច្បាប់ស្នាក់នៅដាច់ដោយឡែក (Social Distancing) ដែលអនុម័តដោយរដ្ឋាភិបាលដើម្បីទប់ស្កាត់ការឆ្លងរាលដាលនៃជំងឺថ្មី។
អ្នកនាំពាក្យរបស់ក្រុង Dnipro គឺលោកស្រី Yulia Vitvitska បានបញ្ជាក់ប្រាប់សារព័ត៌មានមួយថា ទីក្រុងនេះបានជីកផ្នូរចំនួន ៦១៥កន្លែង និងថង់ប្លាស្ទិកសម្រាប់រុំសាកសពចំនួន ២ពាន់ ត្រៀមទទួលអ្នកស្លាប់ដោយសារជំងឺកូវីដ-១៩។ ជាមួយគ្នានេះដែរ លោកអភិបាលក្រុង Borys Filatov ក៏បានលើកឡើងថា បុគ្គលិកពេទ្យនឹងមិនអនុញ្ញាតឲ្យធ្វើកោសល្យវិច័យលើមនុស្សដែលគេជឿថា បានស្លាប់ដោយសារជំងឺកូវីដ-១៩ នោះទេ។
ពាក់ព័ន្ធនឹងករណីខាងលើ ត្រូវបានមហាជនជាច្រើនធ្វើការបញ្ចេញមតិផ្សេងៗគ្នា ដោយអ្នកខ្លះបានលើកឡើងថា ការធ្វើបែបនេះគឺជាការបង្កភាពភិតភ័យថែមមួយកម្រិតទៀត ព្រោះប្រជាជនកំពុងតែភិតភ័យស្រាប់ទៅហើយ។ រីឯអ្នកមួយចំនួនទៀត បានកោតសរសើរចំពោះវិធីសាស្រ្ដមួយនេះ ព្រោះអាចបង្ខំឲ្យប្រជាជនមានការប្រុងប្រយ័ត្នដោយស្នាក់នៅក្នុងផ្ទះ៕
សូមទស្សនាវីដេអូខាងក្រោម៖