ក្រសួងអប់រំ សម្រេច​ពន្យារ​ពេល​ប្រឡង​បាក់​ឌុប និង​ឌីប្លូម​ ក្នុង​ឆ្នាំនេះ

ក្រសួងអប់រំ បានប្រកាសពីការពន្យារពេល នៃការរៀបចំការប្រឡងសញ្ញាបត្រមធ្យមសិក្សាទុតិយភូមិ(បាក់ឌុប) ដែលគ្រោងធ្វើចាប់ពីថ្ងៃទី ១៧ សីហា ដល់ថ្ងៃទី៩កញ្ញា ឆ្នាំ២០២០។ ក្រៅពីនេះ ក្រសួងក៏ពន្យារពេល​ប្រឡងសញ្ញា​បត្រមធ្យម​សិក្សាបឋមភូមិ (ឌីប្លូម) ដែលគ្រោងធ្វើនៅថ្ងៃទី៣ ខែសីហា ដល់ថ្ងៃទី១០ សីហាឆ្នាំ២០២០នេះ ផងដែរ។

ជាការកត់សម្គាល់ ក្រសួងបញ្ជាក់ថា កាលបរិច្ឆេទនៃសម័យប្រឡងថ្នាក់ជាតិទាំង២កម្រិតនេះ នឹងបញ្ជាក់​នៅពេល​ក្រោយ។ នេះបើតាមការណែនាំរបស់ក្រសួងអប់រំ ចេញផ្សាយនៅថ្ងៃទី ៨ មេសានេះ។

ទន្ទឹមនឹងការប្រកាសពន្យារពេលប្រឡងទាំង២កម្រិត ក្រសួង បញ្ជាក់​ឲ្យ​សិស្សានុសិស្ស ត្រូវស្វ័យសិក្សា​នៅតាមផ្ទះ ដោយប្រើប្រាស់​សៀវភៅគោល និងតាមរយៈប្រព័ន្ធអេឡិចត្រូនិក(E-Learning) ដែល​មាននៅក្នុងគេហទំព័រផ្លូវការ​ក្រសួង ដែល​រួម​មាន YouTube និង Facebook ផ្លូវការ​របស់ក្រសួងអប់រំ ឬមជ្ឈមណ្ឌលសិក្សាអេឡិត្រូនិក elearning.moyes.gov.kh រួម​ជាមួយនឹងប្រព័ន្ធ E-School Cambodia, ប្រព័ន្ធ Wiki School ទាំងនៅលើកម្មវិធីទូរសព្ទដៃ និងមានចាក់ផ្សាយនៅ​ស្ថានីយទូរទស្សន៍អប្សរាប៉ុស្តិ៍លេខ១១, ទូរទស្សន៍ OneTV ប៉ុស្តិ៍លេខ ៦, ទូរទស្សន៍ខ្សែកាប SkyOne ប៉ុស្តិ៍លេខ៣៥, ទូរទស្សន៍ Wiki School TV ជាដើម និងប្រភពផ្សេងៗទៀត៕