អ៊ីតាលី៖ ក្លិប Inter Milan អាចទិញយកខ្សែប្រយុទ្ធជួរមុខរបស់ Arsenal កីឡាករ Pierre-Emerick Aubameyang ក្នុងតម្លៃខ្លួនត្រឹម៣៥លានអឺរ៉ូ នៅទីផ្សារដោះដូរកីឡាករខាងមុខ នេះបើតាមការចុះផ្សាយរបស់ទីភ្នាក់ងារសារព័ត៌មានអ៊ីតាលី Gazzetta dello Sport។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សក្រុមរបស់លោក Antonio Conte បានដាក់គោលដៅមកលើខ្សែប្រយុទ្ធជម្រើសជាតិហ្គាប៊ុង ដើម្បីទៅជំនួសកន្លែងរបស់ខ្សែប្រយុទ្ធ Lautaro Martinez បើសិនជាកីឡាករជម្រើសជាតិអាហ្សង់ទីនផ្លាស់ទៅចូលរួមជាមួយក្លិបអ្នកមានបុណ្យ Barcelona។
រម្លឹកទៅកាន់កាលពីទីផ្សារខែមករា Aubameyang មានតម្លៃខ្លួនប្រមាណជា៥០លានអឺរ៉ូ សម្រាប់បណ្ដាក្លិបនានាដែលចង់បានរូបគេ ប៉ុន្តែបើតាម Gazzetta ពេលនេះ Inter Milan អាចនាំយករូបគេនៅទីផ្សាររដូវក្ដៅក្នុងតម្លៃត្រឹម៣៥លានអឺរ៉ូប៉ុណ្ណោះ។
នៅរដូវកាលនេះ Aubameyang ចូលលេងក្រោមការដឹកនាំរបស់លោក Unai Emery និងលោក Mikel Arteta បាន៣៣ប្រកួត រកបានគ្រាប់បាល់២០គ្រាប់ និងបញ្ជូនបាល់ឲ្យមិត្តរួមក្រុមបញ្ចប់ទីបានសម្រេច១លើក។
ក្រៅពី Aubameyang កាសែតក្នុងស្រុករបស់អ៊ីតាលីមួយនេះបានបន្តឲ្យដឹងថាខ្សែការពាររបស់ Chelsea កីឡាករ Emerson Palmieri ក៏ជាគោលដៅនាំចូលនៅទីផ្សារពេលខាងមុខផងដែរ ដោយក្លិប Inter Milan បានចែចូវគេតាំងពីទីផ្សារខែមករាកន្លងទៅ ខណៈកិច្ចន្យារបស់កីឡាករជម្រើសជាតិអ៊ីតាលីនៅ Stamford Bridge មានសុពលភាពមួយឆ្នាំទៀតប៉ុណ្ណោះ៕
ប្រភព៖ AF