បាងកក៖ មន្ត្រីសុខាភិបាលថៃបាននិយាយនៅថ្ងៃច័ន្ទនេះថា ប្រទេសថៃទើបតែបានរកឃើញអ្នកឆ្លងវីរុសកូរ៉ូណាថ្មីចំនួន ៥១ នាក់ និងអ្នកស្លាប់ ៣ នាក់បន្ថែមទៀត។ នេះបើយោងតាមទីភ្នាក់ងារព័ត៌មាន Bangkok Post ចេញផ្សាយនៅថ្ងៃច័ន្ទ ទី ៦ ខែ មេសា ឆ្នាំ២០២០។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
លោក Taweesin Wisanuyothin ដែលជាអ្នកនាំពាក្យបាននិយាយថា៖
ក្នុងចំណោមអ្នកឆ្លងវីរុសកូរ៉ូណាថ្មីទាំង ៥១ នាក់នោះ រួមមាន ១៣ នាក់ គឺជាបុគ្គលិកពេទ្យ។ ចំណែកឯករណីអ្នកស្លាប់ថ្មីទាំងបីរួមមាន ទី១ បុរសជនជាតិថៃ ដែលមានអាយុ ២៨ ឆ្នាំ បានស្លាប់នៅក្នុងមន្ទីរពេទ្យមួយក្នុងទីក្រុងបាងកក ទី២ បុរសជនជាតិថៃ ដែលមានអាយុ ៥១ ឆ្នាំ បានស្លាប់នៅមន្ទីរពេទ្យឯកជនមួយក្នុងទីក្រុងបាងកក ហើយអ្នកជំងឺដែលស្លាប់នេះ គឺធ្លាប់មានជំងឺទឹកនោមផ្អែម លើសឈាម និងលើសជាតិខ្លាញ់ប្រចាំកាយ ចំណែកទី៣ គឺជាស្ត្រីជនជាតិថៃ ដែលមានអាយុ ៥៩ ឆ្នាំ បានស្លាប់នៅមន្ទីរពេទ្យឯកជនមួយក្នុងទីក្រុងបាងកក ហើយអ្នកជំងឺដែលស្លាប់នេះ គឺធ្លាប់មានជំងឺទឹកនោមផ្អែមប្រចាំកាយ។
សូមបញ្ជាក់ផងដែរថា បើគិតមកដល់ថ្ងៃនេះ ចំនួនអ្នកស្លាប់ដោយសារវីរុសកូរ៉ូណានៅក្នុងប្រទេសថៃបានកើនឡើងដល់ ២៦ នាក់ ខណៈអ្នកឆ្លងកើនដល់ ២,២២០ នាក់ ហើយក្នុងនោះមានអ្នកជំងឺ ៧៩៣ នាក់បានជាសះស្បើយ ចំណែកអ្នកជំងឺ ១,៤០១ នាក់ផ្សេងទៀត គឺកំពុងសម្រាកព្យាបាលនៅមន្ទីរពេទ្យនៅឡើយ៕
Bong I.T