ភ្នំពេញ៖ ខ្សែភាពយន្តភាគខ្មែរថ្មី រឿង រាជបុត្រកង្កែប ដែលកំពុងចាក់កញ្ចាំងនៅលើកញ្ចក់ទូរទស្សន៍ហង្សមាស HDTV រៀងរាល់ថ្ងៃច័ន្ទ ដល់ថ្ងៃពុធ និងមានការចូលរួមសម្ដែងពីសំណាក់តារាចម្រៀងល្បីប្រចាំផលិតកម្មហង្សមាស លោក នី រតនា កញ្ញា វី ឌីណែត អ្នកនាង សួស វីហ្សា និងលោក ថែល ថៃ នោះ កំពុងរងនូវការរិះគន់យ៉ាងខ្លាំងពីសំណាក់ទស្សនិកជន ជាពិសេសទទួលរងនូវការប្រៀបធៀបទៅនឹងរឿងផ្សេងៗទៀត។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សក្នុងនោះ ទស្សនិកជនមួយចំនួនបានចូលទៅខមមិន ក្នុងការបង្ហោះវីដេអូឈុតខ្លីៗរបស់រឿងនេះ នៅលើទំព័រហ្វេសប៊ុក និងឆានែលយូធូប របស់ Hang Meas Khmer Drama ក្នុងន័យរិះគន់ស្ថាបនាទៅលើរឿងភាគខ្មែរមួយនេះ។ ទស្សនិកជនបានផ្ដោតសំខាន់ទៅលើបច្ចេកទេសថតដែលមិនសូវបានល្អដូចរឿងភាគមុនៗ និង ការសម្ដែងរបស់តួអង្គ ដែលមានលក្ខណៈឆ្គងច្រើន។
ប៉ុន្តែទស្សនិកជនភាគច្រើនចូលចិត្តការសម្ដែងរបស់ វី ឌីណែត ជាងគេ ព្រោះនាងសម្ដែងសមទៅនឹងចរិតលក្ខណៈរបស់តួអង្គ។ មួយវិញទៀត ទស្សនិកជន ក៏បានរិះគន់ទៅលើសម្លេងផងដែរ ព្រោះសម្រាប់រឿងនេះ គេយកសម្លេងតួអង្គផ្ទាល់ ខុសពីរឿង រាជិនីភូមិគ្រឹះ និងរឿងមុនៗ ដែលប្រើការបញ្ចូលសម្លេង ទើបបណ្ដាលឲ្យមានការរិះគន់ថា តួអង្គរឿងនេះនិយាយមិនសូវពិរោះ ហើយរាងភ្លាវទៀត។
និយាយជារួម ទស្សនិកជនភាគច្រើនសម្ដែងការយល់ឃើញថា រឿងនេះមានចំណុចខ្សោយច្រើន បើប្រៀបធៀបទៅនឹងរឿង រាជិនីភូមិគ្រឹះ ដែលទើបនឹងចាក់បញ្ចាំងចប់មុននេះ។
ទោះបីយ៉ាងណាក៏ដោយ ក៏រឿងនេះនៅតែទទួលបានការគាំទ្រពីទស្សនិកជនជាច្រើនផ្សេងទៀត និងបានធ្វើការលើកទឹកចិត្តដល់អ្នកដឹកនាំ និងតារាសម្ដែងឲ្យខិតខំបន្តទៀត កុំចុះចេញនឹងពាក្យរិះគន់ទាំងនេះ៕