មាន Firmino មែនពិត តែ Klopp ឆ្លៀតចាប់ចិត្តចង់បានខ្សែប្រយុទ្ធកំពុងឡើងកូដនៅ Bundesliga ម្នាក់នេះទៀត

អាល្លឺម៉ង់៖ យោងតាមរបាយការណ៍ ក្នុងប្រទេសអាល្លឺម៉ង់បានឲ្យដឹងថា អ្នកចាត់ការទូទៅក្រុមហង្សក្រហម Liverpool លោក Jurgen Klopp បានមានចំំណាប់អារម្មណ៍ ក្នុងការចុះកុងត្រាយកខ្សែប្រយុទ្ធ Milot Rashica របស់ក្លិប Werder Bremen នៅរដូវក្ដៅខាងមុខ។

ក្នុងរយៈពេលប៉ុន្មានខែចុងក្រោយនេះ ក្លិបជើងឯក Champions League រដូកាលមុន ត្រូវបានគេរាយការណ៍មកថា មានជាប់ពាក់ព័ន្ធទៅនឹងការផ្ទេរយកកីឡាករ៣ទៅ៤រូបនៅក្របខណ្ឌ​ Bundesliga ក្នុងនោះរួមមានខ្សែប្រយុទ្ធ Timo Werner, Jadon Sancho, និង Kai Havertz។

យ៉ាងណាមិញ បើយោងតាមការចុះផ្សាយរបស់កាសែត Bild ខ្សែប្រយុទ្ធ Rashica ជាកីឡាករនៅក្របខណ្ឌ​ Bundesliga មួយរូបទៀតហើយ ដែលគ្រូបង្គោលក្រុម Liverpool កំពុងតាមដានយ៉ាងយកចិត្តទុកដាក់ មុនពេលទីផ្សារដោះដូររដូវក្ដៅបើកទ្វារ។

ប្រភពខាងលើបានបន្ថែមទៀតថា ក្លិបហង្សក្រហម ត្រូវចំណាយខ្ទង់ ៣៣លានផោន (ឬប្រមាណ៤០លានដុល្លារ) ប្រសិនបើចង់នាំយកខ្សែប្រយុទ្ធវ័យ២៣ឆ្នាំ ទៅកាន់កីឡដ្ឋាន Anfield ។

គួរបញ្ជាក់ផងដែរថា បើទោះជារដូវកាលនេះ Rashica មិនអាចជួយក្រុម Bremen ឈរនៅចំណាត់ថ្នាក់ល្អប្រសើរមួយក្នុងក្របខណ្ឌ Bundesliga ក៏ដោយ ប៉ុន្តែទម្រង់លេងរបស់ជម្រើសជាតិកូសូវ៉ូរូបនេះ ត្រូបានគេសង្កេតឃើញថាល្អ ពោលក្នុងចំណោមការបង្ហាញខ្លួន២៤ប្រកួត គេរកបានបាន១០គ្រាប់ ថែមទាំងបញ្ជូនបាល់ឲ្យមិត្តរួមក្រុមសម្រចទីបាន៥ដងទៀតផង៕

ប្រភព៖ ghanasoccernet